Në një fjalim në akademinë e njohur ushtarake West Point në shtetin federal amerikan Nju Jork presidenti amerikan Barack Obama u shpjegoi të mërkurën (02.12) amerikanëve, si cila do të jetë strategjia e operacionit ushtarak në Afganistan. Pikat kryesore: Bazat ushtarake amerikane, që përfshijnë ndërkohë afro 68.000 ushtarë, do të forcohen me 30.000 të tjerë. Përforcimi do të bëhet verën e ardhshme. Një vit më vonë në korrik 2011, do të nisë pastaj tërheqja – e thënë më mirë faza, kur siguria do të kalojë gradualisht në duart e forcave ushtarake dhe policore afgane. Se sa do të zgjasë kjo fazë dhe sa shpejt do të kryhet tërheqja e trupave, do të varet nga situata në vend, tha presidenti.

Kjo temë trajtohet sot edhe prej shtypit gjerman.

Fillimisht në 'Berliner Zeitung' lexojmë:

"Në parim qeveria gjermane e di shumë mirë se nuk është në gjendje që të mbajë në fuqi për një kohë të gjatë qëndrimin refuzues për shtimin e trupave në Afganistan. Kjo për faktin se është e qartë që aventura në Afganistan mund të përfundojë me sukses vetëm nëse në të njëjtën kohë forcohen përpjekjet ushtarake dhe civile. Për të mos prishur gjoja qetësinë e krishtlindjeve në vend, qeveria gjermane luan me faktorin kohë. Por në fund të dimrit problemi i vjetër do të dalë sërish në sipërfaqe dhe ajo do të sqarojë përse shtimi i trupave ushtarake është zgjidhja e vetme në Afganistan. Atëherë do të shtrohet pyetja me të drejtë: përse është humbur me muaj të tërë një kohë me kaq vlerë. Muaj me vlerë të paktën për njerëzit në Afganistan."

'Ostsee-Zeitung' e cila botohet në Rostok shkruan:

"Aleatët si Gjermania, Britania e Madhe dhe Franca nuk do ta evitojnë dot shtimin e trupave të tyre në Hindukush. Edhe pse Kancelarja Merkel ngurron ende, ajo nuk mund t'ia lejojë vetes që të mos e mbështesë presidentin amerikan. Prioritetet për luftën kundër talebanëve, El Kaidës dhe kriminelëve përcaktohen në Uashington. Kjo shkakton gjendje të pakëndshme. Kjo është e kuptueshme për shkak se deri tani shtimi i trupave nuk e ka përmirësuar gjendjen e sigurisë në Afganistan. Thirrjet për shtimin e angazhimit civil tani për tani janë shuar. Korrupsioni dhe droga sa vijnë e shtohen, në Kabul qeveris një president që s'ta mbush mendjen. Popullata ka shumë pak besim tek elita e vendit. Strategjia e presidentit amerikan Barack Obama është në rrezik, suksesi i paqartë, një dështim do të ishte fatal. Nobelisti i paqes e ka lënë fatin e tij politik në duart e gjeneralëve."

Autot: Esat Ahmeti
Redaktor: Pandeli Pani