240411 Papst Osterbotschaft
24 Prill 2011Një det lulesh në Sheshin e Shën Pjetrit - verdhë e blu, ngjyrat e Vatikanit. Për këtë përgatitjet ishin bërë për ditë të tëra. Kopshtarë nga Holanda ditët e fundit transportuan për në Romë 30.000 lule - 20.000 syresh janë tulipanë si edhe rreth 1000 zymbylë, që pas festimeve në Vatikan do të mbillen në parqet e Romës.
Qysh në mëngjes herët të dielën vizitorë nga e mbarë bota vërshuan drejt sheshit të Vatikanit - sivjet ishin mbi 30.000 syresh. Edhe moti ishte në përgjithësi i përshtatshëm për vizitorët, pas një qielli disi të turbullt shkëlqu dielli - ndërkohë që të shtunën (23.04) në Romë kishte rënë shi. Me Papën festuan në shkallët e bazikilës së Shën Pjetrit edhe shumë kardinalë e dinjitarë të tjerë.
Qysh në fillim Capella Sistina këndoi tekstin nga Matheus-Evangelium, në të cilin Jezusi veçon prej turmës së të rinjve pasues Apostullin Pjetër. Për kishën katolike ky është argumentimi biblik i papatit: "Ti je Pjetri dhe në këtë shkëmb dua të ndërtoj kishën time."
Mesazh paqeje - Pika kulmore e cermonive
Mesha e Pashkëve tradicionalisht kremtohet pa predikim - sepse në mesditë është momenti, që e presin më së shumti besimtarët në sheshin e Shën Pjetrit. Papa në këtë moment ngjitet në ballkonin e mesëm të bazilikës së Shën Pjetrit, vendi, ku edhe pas zgjedhjes së Papës komunikohet lajmi „Habemus Papam“ . Në mesazhin tradicional të Pashkës Benedikti i XVI sivjet iu referua në radhë të parë rajoneve të botës, në të cilat mbizotëron vuajtje e madhe. „Këtu në këtë botë Halleluja e Pashkëve është në kontrast me ankesat dhe britmat, që dalin prej situatave shumë të dhimbshme: mjerimi, uria, sëmundjet, lufta dhe dhuna. E pikërisht për këtë arësye Krishti ndërroi jetë dhe u ringjall!“
Papa përkujtoi në këtë kontekst viktimat e tërmetit në Japoni - por urimet e paqes ai i adresoi edhe në drejtim të Lindjes së Mesme, Bregut të Fildishtë dhe Libisë. “Diplomacia dhe dialogu qofshin në vendin e armëve në Libi- dhe në situatën aktuale të konfliktit të mundësohet aksesi i ndihmës humanitare tek ata, që vuajnë pasojat e konfliktit.“
Në këtë kontekst Papa u shpreh edhe për solidaritet me refugjatët nga Afrika e Veriut duke theksuar, se dëshiron më shumë gatishmëri për pranimin e tyre.
Në mbyllje të ceremonisë Papa dha bekimin "Urbi et Orbi" - qytetit dhe rruzullit tokësor dhe përshëndeti besimtarët në të gjithë botën në 65 gjuhë: „Të gjithëve një festë Pashke të bekuar e të gëzuar. Qoftë me ju paqja dhe gëzimi i Zotit të ringjallur!“
Rreth 100 kanale televizive nga 60 vende e transmetuan drejtpërdrejt ceremoninë. Miliona vetë në mbarë botën e ndoqën drejtpërdrejt edhe në radio këtë moment.
Në prag të luminimit të Gjon Palit të II
Për 84 vjeçarin Benedikt i XVI mbyllen në këtë të diel të Pashkëve edhe ditët intensive me shumë mesha të mëdha duke nisur me liturgjinë e së enjtes së gjelbër me larjen e këmbëve në bazilikën laterane duke vazhduar me rrugën e kryqëzimit në Kolose e deri në mbyllje të dielën.
Pas meshës në sheshin e Shën Pjetrit Papa për disa ditë u nis për në rezidencën Castel Gandolfo në Jug të Romës. Të djelën e ardhshme (1.5.) atë e pret një tjetër ceremoni e madhe, lumnimi i paradhësit të tij Gjon Pali i II. Për këtë ditë, qyteti i përjetësisë parashikon ardhjen e miliona pelegrinëve. Disa prej tyre kanë mbërritur qysh tani në qytet - që të djelën në Sheshin e Shën Pjetrit mund të lexosh pankartat përkujtimore për polakun Karol Vojtila.
Autor: Jan-Christoph Kitzler / Vilma Filaj-Ballvora
Redaktoi: Auron Dodi