Votimi në parlamentin turk rezultoi ashtu siç pritej. 507 deputetë votuan për një ofensivë të mundshme ushtarake dhe 19 kundër. Përpara votimit, deputetët turq diskutuan në parlament mbi 2 orë. Zëdhënësi i qeverisë Xhemil Çiçek tha se ndonëse nuk e dëshiron marshimin e Turqisë në Irak, mundësia ekziston:

"Vendimi për të cilin flasim diskutohet nga opinioni publik si mënyra e vetme për të luftuar terrorizmin. Ky interpretim shkakton keqkuptime. Por është gjithashtu e vërtetë se nuk ekziston ende një zgjidhje për këtë problem. Sidoqoftë një ofensivë ushtarake është njëra nga mundësitë për ta luftuar problemin e terrorit."

Partia kurde, DTP ishte e vetmja parti kundër këtij vendimi. Kjo parti ka hyrë në parlament pas zgjedhjeve parlamentare në verë të këtij viti dhe shumë turq kanë shprehur shqetësimin e tyre se kjo parti ka marrëdhënie të mira me partinë e ndaluar kurde, PKK.

Deputeti i kësaj partie Selahetin Demirtas: "Një mision ushtarak përtej kufijve turq do të përkeqësojë ndjeshëm situatën në rajonet përkatëse. Një mision i tillë do të shkaktonte më shumë varfëri, më shumë papunësi dhe më pak liri. Parlamenti duhet të përqëndrohet më shumë tek masat e sigurisë. Parlamenti duhet të krijojë shpresën se do vërtet zgjidhje paqësore. Për këtë arsye ne do të votojmë kundër kërkesës për ndërhyrje ushtarake."

Aprovimi i deputetëve në Ankara nuk do të thotë në mënyrë automatike se parlamenti dha urdhërin për marshim. Ky vendim i lejon kryeministrit që të përdorë ushtrinë në rast domosdoshmërie, e ta dërgojë atë drejt Irakut. Por sidoqoftë mbetet ende hapur nëse ushtria turke do të marshojë vërtet drejt vendit fqinj për të luftuar rebelët e partisë kurde PKK. Vendimi i parlamentit turk mund të kuptohet fare mirë si një sinjal se populli turk qëndron i bashkuar dhe është i vendosur.

Ndërkohë zëvendëspresidenti irakian, Hashemi, i cili ndodhet ende në Turqi për të zhvilluar biseda dipolamtike, u shpreh se është i bindur që Turqia nuk do t´i dërgojë trupat e saj ushtarake në Irak. Vendi i tij do ta luftojë vetë PKK-në. Por Iraku ka nevojë për më shumë kohë, tha ai. Grupi separatist kurd PKK vlerësohet si nga Turqia, ashtu edhe nga Iraku, SHBA-s dhe BE-ja si organizatë terroriste.