Gazeta "Frankfurter Allgemeine Zeitung" vlerëson situatën e përgjithshme:

"Sigurisht që është e shëmtuar që partia radikale nacionaliste e Vojislav Sheshelit dhe partia socialiste e drejtuar dikur nga Sllobodan Miloseviçi kanë marrë një të tretat e votave. Por ky është rezultati i zgjedhjeve demokratike të cilat u zhvilluan pa incidente të forta. Në një shtet i cili deri para disa vitesh e kuptone rëndësinë e vet në rajon vetëm me forcën e tij shkatërrimtare, kjo nuk ka qenë e vetëkuptueshme. Testi i vërtetë për demokracinë serbe do të jetë pavarësia e Kosovës, e cila po afrohet e Kosovës", komenton Frankfurter Allgemeine.

Gazeta Kölnische Rundschau hedh një dritë në anën tjetër:

"Vërtet që Partitë demokratike në Serbi i fituan zgjedhjet, por kjo ishte larg të triumfuarit. Për triumf duhet bashkimi i atyre forcave të cilat deri tani kanë qenë në armiqësi të brendshme. Në rradhë të parë kryeministri Vojislav Koshtunica nga rradhët e partisë nacional-konservatore duhet të reflektojë dhe t´i lerë postin një njeriu të besuar të Presidentit Boris Tadiç".

Gazeta "Landeszeitung" e konsideron të pamundur një kompromis midis "demokratëve":

"Fitoret janë të dyshimta në një vend ku humbjet ushtarake janë kthyer në mite ekzistence kombëtare. Kështu edhe fitorja e kampit demokratik në zgjedhjet në Serbi përmban në vetvete helmin e humbjes. Optimizmi i ministrit të jashtën federal të Gjermanisë Frank-Valter Steinmeier, se Serbia do të futet në rrugën drejt Evropës duket paksa i çuditshëm. Megjithëse dy të tretat e serbëve votuan për partitë demokratike pro evropiane, këto janë aq në konflikt me njëra tjetrën sa një koalicion është i pamundur", nënvizon "Landeszeitung".

Gazeta e "Frankfurtit Märkische Oderzeitung" shikon një rrezik eksploziv në çështjen e Kosovës:

"Partia radikale që doli fituese e zgjedhjeve mesa duket nuk do të përfaqësohet fare në qeveri. Megjithatë çdo qeveri duhet që për çështjen e Kosovës që pritet të zgjidhet së shpejti, të marrë në konsideratë edhe parinë radikale që synon një Serbi të madhe. Sidoqoftë tema emocionale e Kosovës për të cilën çdo serb dëshiron të jetë patriot mund të kthehet shpejt në një pengesë serioze për çdo qeveri në Beograd."

Në mënyrë të ngjashme e komenton edhe gazeta "Neue Westfälische" nga Bielefeldi:

"Që në Kosovë ndodhet djepi kulturor i Serbisë është njëra anë, ana tjetër është se shqiptarëve të Kosovës duhet t´u sigurohet një lloj pavarësie. Por këtë të vërtetë të hidhur nuk guxojnë ta publikojnë as edhe vet demokratët. Pa një kompromis për Kosovën dyert e Evropës mbeten të mbyllura për Serbinë. Dhe pa Evropën vendi nuk ka të ardhme. Presidentja e radhës së Këshillit të BE-së, Angela Merkel, ka një detyrë të vështirë përpara."

Gazeta "Münchener Merkur" komenton:

"E sigurtë është, se pa një stabilitet në Serbi nuk mund të ketë stabilitet në Ballkan. Por për këtë nuk mund të shpresohet nëse analizohen zgjedhjet e fundit në Serbi. Evropianët duhet të jetojnë me një vatër shumë të rrezikshme në mesin e tyre në një kohë kur pritet vendimi për statusin e ardhshëm të Kosovës. Sigurisht demokratët kanë fituar më shumë vota dhe në tërësi si koalicion kanë fituar zgjedhjet. Ky do të ishte padyshim një lajm i mirë, aq më tepër që partia e presidentit pro-evropian Tadiç
është forcuar, nëqoftëse këto forca nuk do të ishin në konflikt. Një formim i qeverisë pa probleme është i vështirë dhe një koalicion qeverisës thuajse i pamundur për momentin."