Me sa duket për të shmangur një votim të detyrueshëm me ligj në Kongres, qeveria amerikane e konsideron luftën me Iranin të përfunduar. Kështu u shpreh një përfaqësues i qeverisë. Ligji "War Powers Resolution” i vitit 1973 parashikon që një operacion ushtarak duhet të përfundojë brenda 60 ditësh; përndryshe, presidenti amerikan ka nevojë për miratimin e Kongresit. Afati prej 60 ditësh përfundonte këtë të premte (01.05.).

Afati është ndërprerë nga armëpushimi

Megjithatë sipas përfaqësuesit qeveria e SHBA-së argumenton se numërimi i afatit është ndërprerë nga armëpushimi që ka hyrë në fuqi që nga fillimi i prillit. "Që nga e marta, 7 prill, nuk ka pasur shkëmbim zjarri midis forcave amerikane dhe Iranit”, citohet ai nga mediat amerikane.

Edhe ministri i Mbrojtjes, Pete Hegseth,  iu referua armëpushimit gjatë një seance dëgjimore në Senat, kur u pyet për nevojën e votimit. Sipas deklaratës së tij qeveria mund ta vazhdojë luftën në çdo moment, pasi afati 60-ditor është ndërprerë prej armëpushimit.

Irani kërcënon me sulme ndaj bazave amerikane

Ndërkohë, një përfaqësues i lartë i Gardës Revolucionare iraniane e ka kërcënuar SHBA-në me sulme të gjata dhe të dhimbshme ndaj bazave ushtarake amerikane dhe anijeve luftarake në rajon, në rast sulmesh të reja amerikane, edhe nëse ato do të ishin të kufizuara.