"Një vit i jashtëzakonshëm me vdekje", thotë Ulrike Gruska e organizatës "Reporterë pa kufij". "88 gazetarët humbën jetën, ndërsa raportonin për luftëra dhe sulme me bomba", thuhet në raport. "Ose ata janë vrarë prej organizatave kriminale të kontrabandistëve të drogës, prej militantëve islamistë, apo me udhëzim të nëpunësve shtetërorë të korruptuar. "

Ka disa arsye për këtë rekord tragjik, thotë Ulrike Gruska: "Kryesisht lufta në Siri, kaosi në Somali dhe talibanët në Pakistan.

Blogger-at dhe raportuesit në internet, ose siç quhen në raport qytetarët - gazetarë, janë goditur rëndë gjatë vitit 2012, 47 syresh kanë gjetur vdekjen. Ata kanë filmuar, fotografuar dhe raportuar mbi burgjet në Siri. "Pa këta njerëz të guximshëm ne nuk do të kishim mësuar asgjë nga Siria. Masakrat do të kishin mbetur sekret". Një vit më parë numri i të vrarëve ka qenë pesë.

Siria ngjall shqetësim

"Varrezë për gazetarët", këtë titull tragjik i jep "Reporterë pa kufij" Sirisë, vendit të përfshirë në luftime. Gjithsej 65 punonjës mediash kanë gjetur vdekjen gjatë ushtrimit të profesionit në vitin 2012 në Siri, 17 gazetarë, 44 qytetarë-gazetarë dhe 4 punonjës mediash. 21 të tjerë janë arrestuar.

"Të jesh gazetar në Siri është si të ecësh në një fushë të minuar", kështu e përshkruan të përditshmen e gazetarëve në atdheun e tij në një intervistë në Damask në vitin 2011 Mazen Darvish. Ka shumë tabu. Disa janë tabu të njohura si temat politike, të drejtat e njeriut apo forma e qeverisë. Qysh prej tetë vjetësh lufton 38-vjeçari, i cili ndër të tjera ka themeluar "Qendrën siriane të Medias dhe Lirisë së Mendimit". Në shkurt Darvish u arrestua. Deri më sot nuk dihet, se ku mbahet ai i burgosur. Atij i janë ndaluar kontaktet me botën jashtë burgut. "Reporterë pa kufij" ka informacione, sipas të cilave Darvishin e torturojnë dhe gjendja e tij është shqetësuese. Reportërët pa kufij e nderojnë sivjet Darvishin me një çmim për angazhimin e tij, ndërsa një çmim tjetër i jepet gazetës afgane "8Sobh", e përtkhyer "Ora tëte e mëngjesit".

"Një vit i zi" konstaton raporti edhe për gazetarët në Somalinë, ku kanë vdekur 18 gazetarë - asnjëherë më parë nuk kanë humbur jetën një numër kaq i lartë gazetarësh në këtë vend. Shumica e tyre kanë rënë viktimë e sulmeve të parameduara.

Në Pakistan sivjet gjetën vdekjen 10 gazetarë dhe një punonjës i medias. Ky vend prej kohësh konsiderohet si një nga më të rrezikshmit për gazetarët, shkruan "Reporterë pa kufij".

Në Meksikë gazetarët janë të rrezikuar, kryeisht ata që shkruajnë për krimin e organizuar, pra për kontrabandën e drogës, korrupsionin dhe lidhjet mes bosëve të krimit dhe nëpunësve shtetërorë. Gjashtë gazetarë kanë gjetur vdekjen gjatë vitit 2012.

Ndër pesë vendet më të rrezikshme "Reporterë pa kufij" konsiderojnë Brazilin - vendi ku në vitin 2014 do të zhvillohet Kampionati Botëror i Futbollit dhe në 2016 Lojërat Olimpike verore. Pesë reporterë kanë gjetur vdekjen në Brazil - dy prej tyre, sipas të gjitha gjasave, janë vrarë sepse kanë hulumtuar raste të kontrabandës me drogë.

Asnjëherë më parë nuk ka pasur kaq shumë gazetarë në burg

Edhe shifra të tjera të hulumtuara nga "Reporterët pa kufij" japin shkas për shqetësim të thellë: Mbi 1.000 gazetarë dhe blogger janë arrestuar. Gati 2.000 reporterë janë kërcënuar e sulmuar.

Nëpër burgje ndërkohë mbahen, sipas këtij raporti, 193 gazetarë - shumica në Turqi. Ndërkohë atje ndodhen 70 gazetarë në burg - "Reporterë pa kufij" është e sigurt se për 42 syresh shkaku i dënimit ka të bëjë me ushtrimin e profesionit. Edhe numri i arrestimeve është i lartë në Turqi.

Kina ndërkohë mban të burgosur gati 100 gazetarë dhe qytetarë - gazetarë, shumica e tyre me burgim afatgjatë dhe në kushte të rënda. Shpesh herë pas këtyre dënimeve fshihet dora e nëpunësve të korruptuar rajonalë, të cilët duan t'i heqin qafe kritikuesit kryesorë të tyre.