Gjithçka duket ndryshe nga parashikimet e djeshme. Tri nga katër institutet demoskopike kishin folur më parë për një avantazh të Geoana-s. Pas mbylljes së qendrave të votimit ato parashikonin humbjen e pushtetmbajëtsit aktual Traian Basescu. Vetëm një institut parashikonte një garë kokë më kokë mes Basescut dhe sfiduesit të tij socialist Mircea Geoana. Por sot në mëngjes Komisioni Shtetëror i Zgjedhjeve njoftoi se pas numërimit të mbi 95 përqind të votave Basescu rezulton të ketë marrë 50,43 përqind të tyre, ndërkohë që Geoana 49,57 përqind.

Kështu përsëriten rezultat e zgjedhjeve të vitit 2004

Edhe atëherë, në zgjedhjen e tij të parë për president në fillim dukej sikur Basescu i kishte humbur zgjedhjet. Ai vetë e paralajmëroi fitoren e tij, ende pa u hedhur votat e fundit. "Ne kemi fituar njëlloj si në vitin 2004. Ju siguroj se rezultatet e anketave treguan qysh në orën 19:00 se e kam mposhtur Mircea Geona-n".

Basescu i cili në kohën e komunizmit ka qenë kapiten anijeje dhe pas kthesës politike kryetar i Partisë Demokratike, ministër i Transportit dhe kryetar i bashkisë së Bukureshtit ka provuar gjatë mandatit të tij pesëvjeçar si president të profilohet si luftëtar kundër terrorizmit, por pa arritur ndonjë rezultat domethënës. Ai është kritikuar shpesh për stilin e tij agresiv dhe autoritar. Në vitin 2007 parlamenti provoi që ta largojë nga posti për shkak të tejkalimit të kompetencave.

Basescu do të vazhdojë me politikën e tij të deritanishme

Në refrendumin e zhvilluar paralelisht me raundin e parë të zgjedhjeve presidenciale Basescu fitoi ndaj parlamentit: pothuajse 90 përqind e elektoratit votuan për zvogëlimin e parlamentit. Dhe siç duket edhe në të ardhmen ai do të vazhdojë me politikën e tij të deritanishme. Këtë ai e bëri të qartë në natën e zgjedhjeve: "Ne nuk kemi variant tjetër nga programi i propozuar nga unë, i cili është miratuar nga rumunët përmes zgjedhjes së tyre. Unë falendëroj të gjithë rumunët të cilët votuan Traian Basescun".

Autor : Jörg Paas / Esat Ahmeti

Redaktoi : Aida Cama