Shkup: arrihet marrëveshje për dalje nga kriza
21 Korrik 2016![Mazedonien Parlament in Skopje](https://static.dw.com/image/19266961_800.webp)
Partitë janë dakorduar që njëqind ditë para zgjedhjeve të parakohshme parlamentare të ketë qeveri teknike dhe që ligji i ri për Ministrin e Punëve të Brendëshme të pezullohet deri më 1 janar të 2017. Ambasadori i SHBA-së në Shkup, Jess Baily, i cili ka qenë i pranishëm në takime shpreson se me këtë marrëveshje do të vendosen binarët drejt rrugës së duhur për zgjëdhje korrekte dhe të pranushme për të gjitha palët. “Partitë arritën marrëveshje një vit pas marrëveshjes së korrikut të kaluar, për zbatimin e mëtejshëm të Marrëveshjes së Përzhinës. Ne shpresojmë se kjo marrëveshje do ta shtrojë rrugën për zgjedhje të besueshme, në të cilat do të marrin pjesë të gjithë dhe do të njihen nga të gjitha palët. Marrëveshja që arritën katër partitë përfshin pastrimin e listës zgjedhore, hapa për sigurimin e një raportimi të balancuar, marrëveshje për qeverinë që do të formohet 100 ditë përpara zgjedhjeve dhe kompetencat e Ministrinë së Punëve të Brendshme”, është shprehur ambasadori amerikan Jess Baily.
11 dhjetori data më e pranueshme për zgjedhje
Sipas përfaqësuesit të BDI-së Artan Grubi proceset eurointegruese si dhe zbatimi i plotë i Marrëveshejs së Ohrit mbeten prioritet i përfshirë në këtë marrëveshjeje. “Katër partitë më të mëdha në vend u dakorduan që të fillojë një proces i përmbushjes së kushteve të mbajtjes së zgjedhjeve të besueshme dhe gjithpërfshirëse brenda këtij viti, ky proces do të zgjasë diku rreth 40 ditë nga dita e sotme, pas së cilës liderët e katër partive do të mblidhen në fund të gushtit dhe do të vlerësojnë a janë përmbushur kushtet apo jo e në këtë konstekst do të përcaktojnë datën për zgjedhjet. Data e vetme për mbajtjen e zgjedhjeve gjatë vitit 2016 mbetet vetëm 11 dhjetori. Për herë të parë që nga pavarësia e Maqedonisë në periudhën pas përfundimit të mandatit të qeverisë për zbatimin e zgjedhjeve ministër i Punëve të Brendshme do të jetë një shqiptar deri në zgjedhjen e qeverisë së re që do të dalë nga rezultatet e votimeve më 11 dhjetor”, ka deklaruar Artan Grubi nga BDI.
PDSH: përgjegjësinë për marrëveshjen e mbajnë partitë në qeveri
Për PDSH-në në opozitë përgjegjësia e kësaj maerëveshjeje mbetet tek tri partitë pjesëmarëse në qeverinë kalimtare, në të cilën PDSH-ja nuk do të bëjë pjesë. “Garanci të forta të faktorit ndërkombëtar për organizim të zgjedhjeve korrekte, të lira dhe demokratike ishin qëllimi kyç i Partisë Demokratike Shqiptare dhe kjo u arrit. Ne jemi krah për krah me faktrorin ndërkombëtar, për sa i përket parandalimit një herë e përgjithmonë manipulimeve të zgjedhjeve, falsifikimit të votës shqiptare. Parandaluam fshirjen masive të shqiptarëve nga lista zgjedhore. Nuk pranuam ftesën për bashkëqeverisje me tri partitë e tjera politike për shkaqe parimore”, ka thënë përfaqësuesi i PDSH në negociata Imer Aliu
Marrëveshja krijon kushte solide për zgjedhje demokratike
Përfaqësuesja e partisë opozitare maqedonase LSDM-se, Radmila Sheqerinska, tha se me ketë marrëveshje duhet të sigurohet që Maqedonia të organizojë zgjedhje korrekte,të drejta dhe të besueshme e që të jetë populli të vendosë se kujt ia jep besimin. “Marrëveshja e tillë krijon kushte që Maqedonia t' japë fund kësaj krize që na mori shumë kohë, energji dhe të mundësojë zgjedhje të lira. Të gjitha kushtet për zgjedhje të lira, përfshirë raportimin korrekt në media, pastrimin e listës zgjedhore, pjesëmarrjen e opozitës në qeverinë kalimtare, liderët e katër partive duhet ta konfirmojnë në një takim që do të mbahet në fund të gushtit. Maqedonia do të ketë zgjedhje të lira ku qytetarët do të thotn fjalën e tyre dhe do t'i japin fund krizës dhe qeverisjes kriminale të Gruevskit”, shprehet nënkryetarja e LSDM Radmilla Shekeriska.
“Jam i kënaqur sepse me këtë marrëveshje i hapet rruga zgjedhjeve demokratike ku do të marrin pjesë të gjithë dhe populli do të vendosë kujt do t'ia japë votat”, ka thënë përfaësuesi i VMRO-DPMNE Nikolla Todorov.
Marrëveshja në mbrojtje të Prokurorisë Speciale
Sa i përket punës së Prokurorisë Speciale, e cila po heton atë që njihet si aferë e përgjimeve që edhe ka nxitur krizën politike, marrëveshja parashikon që në rast se Gjykata Kushtetuese e shpall antikushtetues ligjin për Prokurorinë Speciale, apo ndonjë pjesë të tij, partitë do të duhet të bëjnë ndryshime ligjore për ta mundësuar funksionim e punës së saj pa pengesa.
Sa i përket medias publike RTVM, partitë politike janë dakorduar që LSDM-ja opzitare do të emërojë përgjegjës të redaksisë informative në TVM1 nga ekspertët e fushës së mediave, ku redaktori i ri do të merte funksionin 100 ditë para mbajtjes së zgjedhjeve. Për programin në gjuhën shqipe në television kjo marrëveshje do të mundësojë ndryshime ligjore që TVM 2 të emetojë program në gjuhën shipe 24 orë në ditë.
Takimet e përfaqësuesve të katër partive nënshkruese të Marërveshjes së Përzhinës u intensifikuan pas vizitës së fundit të të dërguarit të posaçshëm gjerman Johanes Haindl dhe diplomates amerikane Viktoria Nuland.