Shkup - Samiti i vendeve të procesit “Bërdo-Brioni”
28 Prill 2018![Treffen der Brdo-Brijuni-Länder in Skopje](https://static.dw.com/image/43574894_800.webp)
Në takimin e procesit "Bërdo-Brioni" kanë marë pjesë presidentja kroate, Kolinda Grabar- Kitaroviq, Borut Pahor president i Sllovenisë, Aleksandar Vuçiq i Serbisë, presidenti i Shqipërisë, Ilir Meta, Filip Vujanoviq, president i Malit të Zi, presidenti Hashim Thaçi si edhe kryesuesi i presidencës së Bosnjës Bakir Izetbegoviq. Mikpritësit e takimit ishin kryeministri bullgar Bojko Borisov dhe presidenti i Këshillit Europian Donald Tusk. Në takim mori pjesë edhe presidenti maqedonas, Gjorgje Ivanov.
Nevoja e sinergjisë më të madhe në iniciativat dhe mekanizmat rajonale dhe në aspekt të ndërtimit të një rajoni inkluziv, janë disa nga konkluzionet që dolën nga takimi i liderëve të Ballkanit Perëndimor, në kuadër të samitit Bërdo Brioni. Poashtu, është konkluduar se procesi i integrimit në BE mbetet katalizator strategjik për përforcimin e paqes, sigurisë, stabilitetit dhe prosperitetit në rajon.
Liderët kanë shprehur gatishmërinë që të vazhdojnë angazhimin e tyre në mbështetjen e ndërsjellë në procesin e integrimeve evropiane dhe euro atlantike. Ata gjithashtu kanë inkurajuar zgjidhjen e çështjeve dhe kontesteve të hapura në frymën e fqinjësisë së mirë dhe në pajtueshmëri me te drejtën ndërkombëtare. Vendet e rajonit duhet të mbyllin çështjet e hapura bilaterale dhe të hapërojnë drejt BE-së, për të bërë Evropën të plotë, ishte mesazhi kryesor i liderëve të rajonit pas takimit në Shkup.
Tusk: Duhet guxim për tejkalimin e konflikteve
Presidenti i Këshillit Evropian, Donald Tusk inkurajoi Maqedoninë që të marrë guximin për të tejkaluar kontestin që ka me fqnjin jugor, Greqinë. "Në Ballkanin Perëndimor vij me porosinë e qartë të të gjithë vendeve anëtare të BE-së, se po përpiqemi fort për perspektivën evropiane të rajonit. Mund të mbështeteni tek ne, dhe këto nuk janë vetëm fjalë të kota por fakt. Nuk bëhet fjalë për tregti, investime dhe para por, mbi të gjitha bëhet fjalë se çfarë shoqërie duam të jemi” ka thënë Donald Tusk presidenti i Këshillit Evropian.
Ivanov: Duam proces paralel të negociatave dhe zgjidhjen e kotestit
Presidenti i Maqedonisë Gjorgji Ivanov kërkoi kreativitet më të madh nga BE, që të mundësoj zhvillim paralel të negociatave për tejkalimin e kontestit dhe negociata për integrim. "Si president e ftoj BE-në që të mundësojë lëvizje paralele të negociatave për anëtarësim dhe tejkalimin e dallimit dypalësh mes Maqedonisë dhe Greqisë. Sipas natyrës së vet zgjerimi është çështje politike dhe jo çështje teknike. Çështja politike nuk mund të zgjidhet vetëm me qasje teknike por kërkon guxim, vendosmëri dhe kreativitet nga BE-”, është shprehur Gjorge Ivanov president i Maqedonisë.
Meta: Rajoni ka një ambicie të përbashkët - integrimin europian
Presidenti i Shqipërisë Ilir Meta ka thënë se bashkëpunimi rajonal është përmirësuar në mëmyrë drastike dhe se ka rezultate në shumë fusha. Kemi përdorur çdo rast për t'u angazhuar në dialog të drejtpërdrejtë, megjithëse jo gjithmonë kemi rënë dakord, ka thënë Meta. "Kemi bërë të mundur që përmes ambicies së përbashkët për integrimin evropian të krijojmë një klimë më të mirë të besimit reciprok dhe mirëkuptimit, kyç kjo për paqen, stabilitetin dhe prosperitetin e rajonit tonë”, është shprehur Ilir Meta.
Thaçi: Përmes dialogut zgjidhen mosmarrëveshjet
Presidenti i Kosovës Hashim Thaçi ka thënë se ky Samit dërgon mesazh tek të gjithë se rajoni ynë ka ndryshuar dhe se është shembull i zhvillimeve pozitive, duke përmendur organizimin e shumë takimeve rajonale në këta muajt e fundit. "Të gjitha këto takime kanë bërë të qartë për të gjithë që sot, vendet e Ballkanit, komunikojnë, bisedojnë, dialogojnë, me njëra-tjetrën si mjet për të zgjedhur çështjet e hapura që kemi. Por edhe si mjet për të artikuluar qartë aspiratat tona për të ardhmen tonë”, ka deklaruar presidenti i Kosovës Hashim Thaçi.
Grabar-Kitaroviç: Çështjet e hapura duhen mbyllur para hyrjes në BE
Presidentja e Kroacisë, Kolinda Grabar-Kitaroviç ka thënë se çështjet bilaterale midis vendeve të Evropës Juglindore duhet të zgjidhen para hyrjes në BE. "Ngadalësimi i zgjerimit krijoi një vakum, ai filloi me paraqitjen e palëve të treta që deshën t'i mbajnë vendet e këtyre anëve jashtë anëtarësimit në BE dhe NATO.Tani shohim ndryshime pozitive dhe përsëri e shohim Komisionin Evropian dhe Këshillin Evropian të fokusuar në zhvillimin e të gjitha vendeve të Evropës Juglindore dhe të vetëdijësuar se zgjerimi dhe konsolidimi i mëtejshëm i BE-së sigurisht përfshin edhe anëtarësimin e të gjitha vendeve tona fqinje”, ka deklaroi Grabar-Kitaroviç.
Kryeministri bullgar Bojko Borisov ka apeluar tek liderët e Ballkanit Perçndimor të evitojnë pengesat në rrugën e integrimit. "Vlerësoj se nuk do të vijmë deri në atë pikë që dikush do të marrë vendim të bëj obstruksione në avancimin tonë me arsye të pabaza. Maqedonia dhe Greqia do të gjejnë mënyrat e zgjidhjes për kontestin rreth emrit dhe kjo duhet të ndodh shumë shpejtë”, ka deklaruar Bojko Borisov kryeministër i Bullgarisë. Për vitin e ardhshëm u ra dakord që Shqipëria ta udhëheq këtë samit.