Shtrëngim duarsh në Maqedoni- shenja e rifillimit të dialogut
18 Tetor 2006![Shkup, parlamenti maqedonas](https://static.dw.com/image/1708986_800.webp)
Tribuna me temë " Dialogu një hap drejt integrimit të Maqedonisë në strukturat euroatlantike" organizuar nga lëvizja qytetare "Zgjohu", arriti më në fund të ulë në një tryezë të përbashkët liderët e pozitës dhe opozitës shqiptare dhe maqedonase.
Pas formimit të Qeverisë dhe kontestimit të legjitimitetit të mandatarit, kryetari i BDI-së Ali Ahmeti, për herë të parë ia ka zgjatur dorën kryeministrit Nikolla Gruevski. Shtrëngimi i duarve dhe foto sesioni i përbashkët Ahmeti-Gruevski është me një domethënie të veçantë për vazhdimin e dialogut politik në Maqedoni, kanë vlerësuar ndërkombëtarët, pjesëmarrës në tribunë.
Kryeministri i Maqedonisë, Nikolla Gruevski, tha se multietniciteti i Maqedonisë duhet shfrytëzuar si përparësi nga qytetarët e jo si pengesë për anëtarësimin e vendit në BE. Dialogu në shoqërinë multietnike është domosdoshmëri pa alternativë, ndërsa për politikanët ai paraqet instrumentin kryesor për arritjen e qëllimeve të tyre.
"Dialogu nuk ka alternativë përkatëse në rregullimin e dallimeve midis civilizimeve, kulturave, shteteve, partive dhe individëve. Dialogu është veçori që u takon vetëm njerëzve, andaj ata përmes tij duhet t'a shpjenë njerëzimin në një të ardhme më të sigurtë."- thotë Gruevski.
Pranimi i dallimeve si një gjë e zakontë dhe zgjidhja e çdo problemi përmes dialogut politik, është rruga më e sigurtë për Maqedoninë drejt anëtarësimit në BE dhe NATO, shprehet Nikolla Gruevski.
Kryetari i BDI-së,Ali Ahmeti, në fjalën e tij ka theksuar se vetëm përmes dialogut konstruktiv, proceset në Maqedoni mund të përfundojnë ashtu siç dëshirojnë qytetarët. Zhvillimet e fundit politike në Maqedoni si pasojë kanë pasur ndërprerjen e dialogut aq domethënës midis pozites dhe opozitës.
Mosrespektimi i legjitimitetit të shumicës shqiptare nga ana e kryeministrit Gruevski ka ndikuar për ndërprerjen e dialogut, ka vlerësuar Ali Ahmeti. Për çështje të mëdha, në Maqedoni duhet të ekzistojë konsensus politik, i cili do ti paraprijë dialogut midis pozitës dhe opozitës. Të gjitha problemet që i kemi parashtruar ne për zgjidhje , mund të gjejne zgjidhje nëse ka vullnet të mirë dypalësh. Flamurtar i zgjidhjeve te problemeve duhet te jete komuniteti shumicë, këtë guxim duhet ta kenë maqedonasit, shtoi Ali Ahmeti.
Për kryetarin e socialdemokratëve Vllado Buçkovski, Maqedonia gjithnjë e më shumë po bie në një krizë të thellë politike. Bllokimi i punimeve në Parlament, ndërrimi i prokurorit publik, mungesa e rezultateve konkrete ekonomike ka çuar qytetarët në një amulli që rezulton me mos pasjen e një ardhmërie të sigurtë politike dhe ekonomike
"Në vitin 2001, Maqedonia filloi me një eksperiment të rrezikshëm që në fund përfundon me një rrëfim të sukseshëm. Një gjë e tillë u mundësua sepse dialogu dhe vetëm dialogu ishte çelësi i zgjidhjes së çështjeve kontestuese ndëretnike "- tha Buçkovski.
Ambasadori i BE-së në Maqedoni, Ervan Fuere ka folur për domosdoshmërinë e realizimit të reformave drejt anëtarësimit të vendit në BE. Dialogu politik është e vetmja shansë e partive politike për të gjetur gjuhë të përbashkët për të gjitha kontestet dhe mospajtushmëritë që kanë të bëjnë me të ardhmen e Maqedonisë.