Në Gjermani, sulmet kundër infrastrukturës kritike ndodhin pothuajse çdo ditë. Dronë u vunë re kohët e fundit mbi Aeroportin e Mynihut, i cili duhej të mbyllej përkohësisht. Disa aeroporte evropiane, përfshirë Berlinin, kanë raportuar incidente të ngjashme, si dhe sulme kibernetike që kanë paralizuar softuerin e sigurisë. Në të njëjtën kohë, Deutsche Bahn (Hekurudha Gjermane) ishte përsëri viktimë e një akti serioz sabotimi në shina.

Kompanitë private po vuajnë gjithashtu gjithnjë e më shumë nga sulmet në infrastrukturën e tyre digjitale. Sipas Bitkom, shoqatës që përfaqëson kompanitë në sektorin digjital në Gjermani, vetëm kjo përfaqëson një kosto prej 289 miliardë eurosh. Nëse dyshohen në afërsisht 68% të rasteve dyshohet se pas sulmeve ndodhen kriminelë, pothuajse gjysma e kompanive të anketuara thanë se mund të gjurmonin të paktën një sulm derinë Rusi. Një numër i ngjashëm kompanish ishin në gjendje të lidhnin incidentet me Kinën.

Gjermania: Sulmet kibernetike shkaktojnë miliarda euro dëme

Kremlini bëhet gjithashtu përgjegjës për kërcënimet e fundit me dronë në Evropë. "Është shumë e pamundur që ky të jetë një aktor privat. Ka profesionistë këtu me pajisje të shtrenjta. Me shumë mundësi, është një aktor shtetëror", thotë Manuel Atug, ekspert i sigurisë së infrastrukturës në qendrën kërkimore AG Kritis.

Qëllimi i sulmeve, si fizike ashtu edhe online, mund të jetë "destabilizimi i shoqërisë nga brenda në mënyrë që njerëzit të humbasin besimin te institucionet dhe qeveria", beson Atug.

BND: Sulme kibernetike pothuajse të përditshme ndaj institucioneve shtetërore

Shërbimi sekret gjerman BND deklaroi në fillim të shtatorit se sulmet kibernetike kundër institucioneve shtetërore dhe infrastrukturës kritike ndodhin "pothuajse çdo ditë". Kancelari gjerman Friedrich Merz pranoi se "situata e sigurisë në historinë e pasluftës së vendit rrallë ka qenë kaq serioze".

Eksperti i sigurisë i CDU-së, Roderich Kiesewetter, i tha gazetës Handelsblatt se "rreziku po rritet sepse, në veçanti, Rusia po përdor gjithnjë e më shumë jo vetëm dronë zbulues, por edhe dronë të armatosur". Ai paralajmëroi se qeveria nuk mund t'i fajësojë vetëm operatorët privatë të aeroporteve për çështje kaq serioze sigurie dhe mbështeti shpalljen e gjendjes së jashtëzakonshme. Kjo do të hapte rrugën për futjen e masave të veçanta, siç është rivendosja e shërbimit të detyrueshëm ushtarak.

Edhe publiku gjerman i druhet gjithashtu një kërcënimi në rritje. Në një studim të kryer këtë vit nga firma e auditimit dhe konsulencës PWC, 67% e të anketuarve shprehën frikë nga "sulmet hibride" nga Rusia. Dhe pothuajse një në dy vetë besonin se qeveria nuk ishte e përgatitur mirë për to.

Rusia dyshohet se ka angazhuar mercenarë për të kryer sulmet

Hetimet për sabotimin e dy linjave kryesore hekurudhore javën e kaluar, midis Hamburgut dhe Berlinit dhe midis Këlnit dhe Dyseldorfit, janë ende duke vazhduar. Në një rast, një pajisje shpërthyese shpërtheu në një tunel ku kalonin trena, dhe në rastin tjetër, u prenë linja elektrike mbi tokë. Sipas Deutsche Bahn, këto ishin vetëm dy incidente në një seri "sulmesh pothuajse të përditshme" që nga fillimi i verës.

Ligjvënësit dhe hetuesit shtrojnë me zë të lartë pyetjen nëse qëndron Rusia pas sabotimit. Ministri i Brendshëm Alexander Dobrindt foli për mercenarë të dyshuar që mund të kenë kryer sulme kundër infrastrukturës në emër të një qeverie të huaj. "Tre nga këta të ashtuquajtur agjentë të nivelit të ulët janë aktualisht në gjyq në Mynih," tha Dobrindt. Ata akuzohen për planifikimin e sabotimit hekurudhor në emër të Moskës.

A kryen edhe ekstremistët e krahut të majtë akte sabotimi kundër hekurudhës?

Disa politikanë, përfshirë Ministrin e Brendshëm të Rinit Verior-Vestfalisë, Herbert Reul, kanë fajësuar ekstremistët e krahut të majtë për sulmet kundër trenave.Motivi: Një letër e hapur që merrte përgjegjësinë për një sulm në linjën hekurudhore midis Duisburgut dhe Düsseldorfit në gusht u botua në një faqe interneti të klasifikuar si e krahut të majtë. "Prandaj, ka të ngjarë që ata që janë përgjegjës të jenë ekstremistë militantë të krahut të majtë", deklaroi Reul.

Sa i përket motivit të ekstremistëve të krahut të majtë për sulmin ndaj linjës hekurudhore, sipas Zyrës Federale për Mbrojtjen e Kushtetutës, Deutsche Bahn konsiderohet më shumë si pronë publike në këtë ambjent. Megjithëse mbështetja për transportin publik është shpesh një kauzë e krahut të majtë, "Deutsche Bahn denoncohet nga kjo zonë si kompania më e madhe logjistike në 'ekonominë kapitaliste fitimprurëse' në Gjermani".

Eksperti i sigurisë Manuel Atug vëren se "kushdo mund të postojë një letër anonime në këtë platformë. Është e pazakontë që asnjë grup tjetër i krahut të majtë nuk ka shprehur solidaritet me ta". Edhe pse kjo nuk do të ishte hera e parë që e majta ka bllokuar trafikun, autoritetet duhet "së pari të kryejnë një hetim të duhur" në vend që të shprehin publikisht dyshime të pakonfirmuara. Kjo vlen edhe për sulmet me dronë dhe kibernetikë. 

Politikanët e opozitës i kërkojnë qeverisë Merz të marrë masa konsekuente dhe të deklarojë qartë se nga vijnë kërcënimet, në vend që të spekulojë pa hetim. Siç i tha radios Deutschlandfunk Konstantin Notz, kreu i politikës së sigurisë për Partinë e Gjelbër: "Publiku gjerman ka të drejtë të marrë informacion të qartë se ku po ndodhin sulmet çdo ditë ose çdo javë, cilat janë dyshimet dhe kush qëndron pas tyre".