Pas tentativës për vrasje me motive raciste ndaj një gjermani me prejardhje afrikane në Pocdam prokuroria federale mori tani përsipër hetimet. Arsyetimi është ky: akti është i tillë që mund të rrezikojë sigurinë e brendshme të RF Gjermane. Prokurori i përgjithshëm Kay Nehm ngarkoi policinë e Pocdamit me hetimet e mëtejshme në emër të tij.

Deri tani nuk ka asnjë gjurmë të dy keqbërësve që sulmuan dhe plagosën për vdekje 37 vjeçarin. Viktima vazhdon të jetë i shtruar me plagë të rënda në kokë dhe në komë artificiale në një klinikë në Pocdam. Gjendja e tij është e qëndrueshme, por mjekët nuk janë ende të sigurt që babai 37 vjeçar do të mbijetojë. Për këtë shprehet shefi i klinikës së Pocdamit Hubertus Wenisch:

"Pozitivja është se deri tani gjendja e tij ka qenë stabile, në fakt që prej mbërritjes në klinikë, dhe nuk janë shfaqur komplikacione, gjë që duhet vlerësuar si ogur i mirë. Por siç e dini në raste kritike ecuria individuale nuk është gjithnjë e parashikueshme."

Megjithatë kaq dihet: Sikur gjermano-etiopiani ta mbijetojë sulmin do të zgjasë shumë derisa ai të jetë përsëri shëndoshë. E shoqja dhe fëmijët duhet t'ia dalin vetë mbanë për aq kohë; por qyteti i Pocdamit dëshiron ta ndihmojë familjen me çdo kusht. Këtë e garanton kryebashkiaku Jan Jakobs:

"Ne i kemi ofruar asaj mbështejtje psikologjike si edhe për përkujdesjen për fëmijët. Në rast se do të ketë probleme materiale, atëherë do të ndihmojmë edhe në këtë drejtim. Kjo është më e pakta që mund të bëjmë, por është edhe e rëndësishme."

Dhe ky nuk do të jetë gjithë reagimi i qytetit. Të martën kryebashkiaku Jakobs dhe krerët e fraksioneve në parlamentin e qytetit u këshilluan për aksionet e mundshme. Synimi i përpjekjeve: të gjithë qytetarët duhet të ndiehen sërish të sigurt në qytet, pasi sulmi u ka futur frikën shumë prej tyre.

Ata shprehin keqardhje dhe kanë planifikuar një shërbesë fetare në mbrëmje në Kishën e Paqes Sans-Souci për viktimën dhe të afërmit. Deri tani policia nuk i ka ka kapur keqbërësit. Ajo ka gjetur në vendngjarje shenjat e gishtërinjve dhe të këpucëve. Hetuesit kanë shpresa edhe nga një regjistrim. Viktima donte t'i telefononte gruas, por me aktivizimin e mailbox-it skena u regjistrua.