Partia Demokratike dhe aleatët e saj zhvilluan në Tiranë para Kryeministrisë protestën e parë të një aksioni të quajtur "Parlamenti para Kryeministrisë”. Sipas organizatorëve ky do të jetë aksion i përjavshëm.

Në një foltore të posaçme do t'u jepet hapësirë për të folur jo vetëm drejtuesve apo deputetëve opozitarë, por edhe qytetarëve të ndryshëm.

Sipas organizatorëve ky vendim vjen pasi opozita akuzon mazhorancën se nuk lejon zhvillimin normaltë seancave parlamentare.

Protestat pritet të vazhdojnë

Kryetari i PD-së, Sali Berisha, thotë se "deputetëve iu lejohet të flitet një herë në nga 9 seanca parlamentare”. Berisha tha po ashtu se foltorja do të bashkojë shqiptarët deri në largimin e kryeministrit Edi Rama dhe zëvendëskryeministres Belinda Balluku.

Kryeministria ishte e "blinduar” me mbrojtëse metalike, dhe të pranishme ishin forca të shtuara të policisë.

Opozita ka njoftuar se do të organizojë edhe një protestë kombëtare, në javët në vijim, por ende nuk është caktuar një datë.

Kjo protestë vjen një javë pas zgjedhjeve të pjesshme lokale në 5 bashki të vendit, të cilat u fituan nga PS. PD nuk kishte zyrtarisht kandidatë, por mbështeti të pavarurit.