Banorë të rajonit të Himarës dhe të zonave të bregdetit jugor shqiptar kanë protestuar kundër përfundimit të afatit të dorëzimit të dokumentacionit për pronat dhe ligjit të shitjen e trojeve të tyre. Në një protestë masive në qendër të qytetit të Himarës ata kërkonin prej qeverisë shqiptare që të mos e njohë ligjin 7501 si dhe të mos e shesë tokën e ishpronarëve për firmat e kompanitë private, me arsyetimin se janë në gjendje të ndërtojnë vetë turizmin dhe të menazhojnë resurset turistik të zonës. Protestuesit kërcënojnë se nëse nuk zgjidhen problemet e tyre, do të bllokojnë rrugën e bregdetit Vlorë-Sarandë, si dhe do të përshkallëzojnë protestën e tyre. Kryetari i bashkisë së Himarës Vasil Bollano thotë se banorët e zonave të bregut kanë të drejtë pasi jo vetëm ligji nuk i ka favorizuar, por edhe vështirësitë në kadastra, regjistra dhe në Ministrinë përkatëse kanë qënë të jashtëzakonshme dhe me limite tejet të shkurtra.

Kundër ligjit 7501 është dhe shoqata e ishpronarëve shqiptarë të cilët kërkojnë jo vetëm shtyrjen e afateve të dorëzimit të dokumentacioneve, por dhe njohjen e kthimin pa kusht të pronave tek ishpronarët. Protesta e ishpronarëve ka pezulluar thuajse krejt edhe punën e entit të legalizimeve të ndërtimeve pa leje, kryesisht në këto prona, sidomos në jug të vendit e në zonat e preferuara për ndërtim e turizëm.

Bllokimi procesit të njohjes së pronave, kërkesat e pronarëve të ligjshëm dhe protestat e tyre, e kanë ngurtësuar industrinë e ndërtimit të turizmit, fshatrave turistikë e deri edhe të prespektivës turistike në bregdetin jugor të vendit. Kthimi real i pronës tek pronarët do të zgjidhë përfundimisht lëmshin e ngatëruar të legjitimitetit të pronës në Shqipëri.