Që prej referendumit para një jave policia ka numëruar 331 incidente, të cilat hyjnë në kategorinë e "krimeve të urrejtjes", bëri të ditur gazeta britanike "The Times". Në këtë mënyrë, numri i incidenteve është pesëfishuar. Së fundi, çdo javë regjistroheshin mesatarisht 63 krime në javë.

Kriminaliteti drejtohet para së gjithash kundër migrantëve, deklaroi Kryetarja e Këshillit përkatës të policisë, Sara Thornton. Kështu, dorasit i kanë sharë bashkëqytetarët e huaj, i kanë sulmuar fizikisht dhe kanë shpërndarë komente ksenofobe në rrjetet sociale dhe në fletëpalosje. Thornton theksoi se policia do ta ndjekë këtë zhvillim. Edhe në të kaluarën, pas vendimeve politike të caktuara është vërejtur një rritje e kriminalitetit të urrejtjes. Por shumicën e herëve shifrat më pas janë reduktuar në nivelin e mëparshëm.

Thirrje e kishës

Ndërkohë, përfaqësues kryesore të fesë, midis tyre Kreu i Kishës Anglikane dhe Kryetari i Konferencës katolike të Ipeshkve - i bënë thirrje shoqërisë britanike që të mos e kompensojë pasigurinë e krijuar nga votimi për Brexit duke kërkuar kurbanë. Frika nuk duhet të bëjë që të huajt të trajtohen me mosbesim dhe me paragjykime raciste, shkruajnë drejtuesit e fesë në një letër të publikuar në "Times". Çdo individ duhet të përpiqet që të mos e kërkojë fajin tek të tjerët, kërkojnë klerikët e lartë.

Sulmet që nisën që ditët e para pas Brexit kundër të huajve e bënë kryetarin e bashkisë së Londrës, Sadiq Khan që të kërkojë vigjilencë të posaçme nga policia. "Ne votuam kundër jush, ju dëbuam me votë, çfarë doni ende ju këtu?" u thonë grupe vendasish migrantëve. Parimi i lëvizjes së lirë në BE u mundëson të gjithë qytetarëve të BE që të kërkojnë punë në të gjithë komunitetin. Por imigrimi në rritje që prej vitit 2012 i shtyu shumë britanikë që të votojnë me "jo" në referendumin për qendrimin apo largimin e Britanisë së Madhe në BE

Fjalë të qarta nga Brukseli

"Kjo nuk do të ndryshojë", bëri të qartë Presidenti i Komisionit Evropian Jean-Claude Juncker në Bratislavë, duke iu referuar parimit të lëvizjes së lirë në BE. Në prag të bisedave me qeverinë sllovake, Junckeri theksoi se Londra duhet t'i pranojë të katër liritë bazë evropiane, po të dojë të përfitojë edhe më tej nga përparësitë e tregut të përbashkët evropian. Kjo do të thotë: nëse britanikët duan të kenë edhe më tej akses në tregun e përbashkët evropian, ata nuk lejohet ta kufizojnë imigrimin nga BE. Por për shumë britanikë ky është njëri ndër kushtet bazë, të cilin duhet ta diskutojnë qeveria e tyre në konsultimet për daljen nga BE.