Pas zgjedhjeve presidenciale në Afganistan, kancelarja Angela Merkel dhe kandidati socialdemokrat për kancelar, Frank-Walter Steinmeier, kanë dhënë deklarata për ardhmërinë e misionit në Afganistan dhe synimet e tyre.

Misioni i ushtarëve gjermanë në Afganistan nuk do të jetë një prej temave më të nxehta në fund të fushatës elektorale për zgjedhjet parlamentare të shtatorit. Kancelarja Angela Merkel, dhe kundërkandidati i saj, socialdemokrati Frank-Walter Steinmeier, kanë qendrime të ngjashme. Që të dy ata mendojnë se duhet të vazhdojë misioni i rreth 4000 ushtarëve gjermanë atje.

Por kandidati i SPD-së për kancelar, ministri i jashtëm Steinmeier, theksoi se Bundeveri nuk mund të kuptohet si ushtri okupatore. Qëllimi i misionit është siguria më e madhe dhe ndihma e afganëve për marrë përgjegjësinë për zhvillimet në vendin e tyre. "Ne nuk jemi futur atje pa kokë dhe nuk do të dalim pa menduar mirë. Por, me presidentin e ri të Afganistanit duhet të merremi vesh për kohëzgjatjen e qedrimit të ushtarëve tanë në këtë vend dhe mundësinë e përfundimit të misionit." Në rast fitore, Steinmeier do të fillonte bisedimet për planin e tërheqjes së trupave, por kandidati socildemokrat nuk flet për planet konkrete. Ai nuk do të flasë për afatet, sepse një lojë e tillë do t'i shkonte në favor talibanëve.

As kancelarja Merkel nuk flet për afate të caktuara për tërheqjen e ushtarëve gjermanë nga Afganistani. Ajo thekson se parakushti për tërheqjen e trupave është vendosja e sigurisë në këtë vend. "E them vetëm se atje duhet të vendoset siguria sa më parë që të jetë e mundur. Ajo që më bashkon me ministrin e Jashtëm është fakti se nuk duhet të flasim për afatet kohore por për synimin përfundimtar."

Këtë strategji nuk e mbështesin të gjithë anëtarët e Unionit të partive CDU-CSU. Ish - ministri i Mbrojtjes Volker Rühe, angazhohet për tërheqjen e Bundesverit mbas dy viteve. Sipas tij, afganët nuk do të angazhohen sa duhet, në qoftë se e dinë se trupat e NATO-s do të mbeten atje edhe 10 vjet. I mendimit krejt tjetër është ministri aktual i Mbrojtjes, Franz Josef Jung, i cili pohon se Bundesveri duhet të mbetet në Afganistan edhe pesë deri 10 vjet.

Vazhdimi i një pune të tillë edhe për 10 vite të tëra, nuk është obsioni më i mirë, pohon Steinnmeier, duke sfiduar kështu kreun e Unionit CDU - CSU. "Mua më nevrikos kakofonia që dëgjohet në këtë momente në radhët e Unionit."

Se me cilin president do të bisedojë në fund qeveria federale gjermane për ardhmërinë e misionit të ushtarëve gjermanë në këtë vend, ende nuk është e qartë. Shumë afganë kanë votuar, pavarësisht kërcënimeve të talibanëve, fakt që është vlerësuar prej të gjitha partive në Berlin. Njëkohësisht, sulmet e fundit vlerësohen si shenjë se vendi akoma nuk është i qetë dhe stabil, siç do të dëshironte bashkësia ndërkombëtare. Opozita në Berlin kërkon angazhim më të madh në krijimin e forcave afgane të sigurisë si dhe forcimin e adminsitratës dhe drejtësisë.

Claudia Roth, e partisë ekologjiste pohon: "Strategjia e deritanishme ku dominon zgjidhja ushtarake nuk është ndonjë zgjidhje e mirë. Dërgimi i ushtarëve të tjerë nuk është zgjidhje, sepse nuk garanton më shumë por më pak siguri."

E vetmja parti e cila angazhohet për tërheqjen e ushtarëve është e Majta gjermane. Duke e ditur se shumica e gjermanëve janë kundër këtij misioni, kjo parti e ka hedhur këtë kërkesë në plan të parë të fushatës.

Autor : Nina Werkhäuser / Bahri Cani

Redaktoi : Aida Cama