Zhvillimet në Kosovë në shtypin gjerman
29 Korrik 2011![Shtypi në gjuhën gjermane](https://static.dw.com/image/6505522_800.webp)
Në artikullin „Urrejtja e vjetër ringjallet sërish“, në gazetën Süddeutsche Zeitung lexojmë:
„International Crisis Group e përshkruan këtë rajon si vatër të „gangsterëve dhe politikanëve të korruptuar“. Atje udhëtohet pa targa, gjykatat mezi funksionojnë, policia kontrollohet nga mafia lokale, në fshehtësi veprojnë agjentë të ministrisë së brendshme serbe. Karburanti këtu është aq i lirë, sa madje edhe shqiptarët vijnë në Mitrovicën e Veriut nga pjesë të tjera të Kosovës për të mbushur serbatorët. Biznesi lulëzon, sepse bandat serbe dhe shqiptare të Kosovës bashkëpunojnë ngushtë. Këto aktivitete nuk ka mundur t'i ndërpresë deri tani as misioni evropian EULEX, edhe për shkak të mosmarrëveshjeve brenda BE. Pesë shtete anëtare (Spanja, Sllovakia, Qipro, Rumania, reqia) hezitojnë ta njohin pavarësinë e Kosovës. Misioni më i madh dhe më i shtrenjtë i BE gjendet para dështimit, sepse Brukseli do të ruajë vetëm stabilitetin sipërfaqësor. Ky do të rrezikohej, në qoftë se ekstremistët në veri do të shfuqizoheshin dhe politikanë shqiptarë të rangut të lartë do të përfundonin në gjyq për korrupsion.“
Në artikullin e gazetës austriake Die Presse „Një hap para, dy prapa“, shkruhet:
„Pas arrestimit të Ratko Mladiçit, pika tjetër në rendin e ditës të pastrimit gjeneral serb dukej se ishte relaksimi në marrëdhëniet me provincën e humbur Kosovën. Prishtinës i përshtatej, çdo afrim i Serbisë mund të shitej si "hap drejt njohjes", edhe pse për këtë me siguri që nuk bëhet fjalë.
Disa javë më vonë gjithçka është përsëri pa vlerë sipas motos „Një hap përpara, dy hapa prapa“. Të dyja palët janë fajtore: Prishtina, sepse dëshirën e kuptueshme për të kontrolluar të gjithë kufinjtë deshi ta arrinte përmes një mase të papritur, që është një të kuptuar disi i çuditshëm i „fqinjësisë së mirë“, e cilat përbetohet gjithnjë zyrtarisht. Dhe Beogradi, sepse toleroi për një kohë të gjatë që rrethet mafioze të lëviznin në Kosovën veriore të dominuar nga serbët si peshqit e Maos në ujë. Që ato pa rezistencë nuk do të linin t'ua bllokonin këtë arterie të jetës me një postë kufitare, ishte e parashikueshme. Për ambiciet e Serbisë për anëtarësim në BE kjo nuk është e dobishme.“
Olaf Ihlau në komentin e tij në revistën Spiegel online, me titull "Sulm i papritur në zonën e diskutueshme", shkruan:
"Pyetja me të vërtetë e vështirë, se çfarë do bëhet me veriun e Kosovës, mund të sqarohet vetëm në negociatat pas fillimit të bisedimeve për anëtarësim. Dhe ato do te jenë eksplozive. Sepse një lloj transferimi i territorit, siç e parashikon Beogradi, mund të shkaktojë ndërmjet Bosnjës dhe Maqedonisë një reaksion zinxhir e të hapte përsëri kutinë e Pandorës, të çonte në shpërthime të reja dhe debime etnike në një paranojë kolektive.Mbulesa civilizuese në pjesën perëndimore të Ballkanit është e hollë.
Mobilizues të ekstremistëve ka dhe më parë sa të duash. Ka qenë një gabim historik i BE që pas luftërave jugosllave nuk i integroi të gjitha shtetet pasuese të shtetit të mëparshëm multietnik me një vrull në BE.
Deri në pranimin e të gjithëve, Ballkani mbetet thembra e Akilit për Evropën.
Në gazetën Frankfurter Allgemeine Zeitung nën titullin „Qetësi e tensionuar në kufirin kosovaro-serb“ lexojmë:
„Për NATO-n ky incident mund të përbëjë një kthesë në përpjekjet e saj për të pakësuar edhe më tej prezencën ushtarake në Kosovë. Trupa e KFOR-it së fundi u reduktua nga 10 000 në 5 000. Në një hap tjetër, se kur ende nuk dihet, trupa mbrojtëse duhet të reduktohet në 2 500 vetë. Kjo deri tani ishte argumentuar vazhdimisht me përmirësimin e gjendjes së sigurisë. Diplomatët thonin, se përveç veriut situata në Kosovë është e qëndrueshme. Mund të merret me mend se disa aleatëve pas ngjarjeve të ditëve të fundit mund t'u ngjallen dyshime në lidhje me reduktimin e mëtejshëm. Nato duhej të ndërhynte, sepse misioni evropian EULEX nuk ishte siç duket në gjendje të reagonte në një incident të tillë. Në fakt përgjegjësia i bie së pari EULEX-it, në qoftë se policia kosovare është në gjendje.“
Autor: die presse,spiegel,faz/av
Redaktoi: Auron Dodi