Ari ya kibiashara Ujerumani yashuka kwa miezi minne
24 Septemba 2024
Ari ya biashara nchini Ujerumani imeshuka kwa mwezi wa nne mfululizo mnamo Septemba, kulingana na uchunguzi uliofanywa huku taifa hilo lenye nguvu kubwa kiuchumi barani Ulaya likijitahidi kujikwamua kutoka mdororo wa uchumi. Faharasi ya taasisi ya Ifo iliyofanya utafiti wa makampuni takribani 1,000 inaonyesha kuwa shauku ya biashara imeporomoka asilimia 85.4 kutoka 86.6 mwezi Agosti.
Rais wa taasisi ya Ifo Clemens Fuest amesema "uchumi wa Ujerumani unazidi kuwa chini ya shinikizo". Utafiti huo unaonyesha kuwa wafanyabiashara wengi hawaridhishwi na mazingira ya sasa ya kiuchumi na kutokuwa na matumaini zaidi kuhusu miezi ijayo. Taasisi ya Ifo inasema imani miongoni mwa makampuni katika sekta muhimu ya uzalishaji ilishuka "kwa kiasi kikubwa", hadi kiwango cha chini kabisa tangu Juni 2020. Fuest ameongeza kuwa kuna upungufu wa uagizaji bidhaa na kwamba sekta ya viwanda Ujerumani "zinatatizika".
Ujerumani ambayo inaongoza kwa mauzo ya nje ilikuwa nchi pekee kubwa kiuchumi ambayo uchumi wake uliendelea kupungua mnamo mwaka 2023, lakini afueni iliyotarajiwa mwaka huu imeshindwa kupatikana huku kudorora kwa uzalishaji bidhaa kukiendelea na mahitaji ya ndani na nje ya nchi bado ni dhaifu.
Utafiti huo wa karibuni wa taasisi ya Ifo unatafsiriwa kuwa "habari mbaya", kwa mujibu wa Fritzi Koehler-Geib, mwanauchumi mkuu katika Benki ya Mikopo ya Umma KfW, na unaongeza ishara kwamba uchumi wa Ujerumani utakuwa "katika hali ya hatari" katika robo ya tatu ya mwaka.Ujerumani kufanya biashara ya nishati na Nigeria
Taasisi zinazoongoza za kiuchumi ikiwa ni pamoja na Ifo katika wiki za hivi karibuni zimeshusha matarajio yao ya kukua kwa uchumi wa Ujerumani na sasa zinatarajia kudorora kidogo kwa uchumi mwaka 2024.Wafanyakazi wa sekta za rejareja na jumla Ujerumani wagoma
Utafiti muhimu ulionyesha siku ya Jumatatu kuwa shughuli za biashara katika kanda inayotumia sarafu ya Euro zilipungua kwa mara ya kwanza katika kipindi cha miezi saba, hasa kutokana na utendaji dhaifu katika mataifa mawili ya juu ya uchumi wa jumuiya hiyo, Ujerumani na Ufaransa.