Msemaji wa serikali ya Yerevan Nazeli Baghdasaryan, amesema hii leo kuwa watu hao wamelazimishwa kuondoka nyumbani mwao.

Taarifa zimeeleza kuwa zaidi ya nusu ya wakaazi wa Nagorno-Karabakh wanaokadiriwa kufikia 120,000 tayari wamelikimbia jimbo hilo wakihofia kushambuliwa kutoka upande wa Azerbaijan.

Mamlaka za Azerbaijan zimekuwa zikiahidi kuheshimu haki za watu wa jamii ya Armenia katika eneo hilo.

Kuna hatari ya mzozo huo uliodumu kwa miongo mitatu kuwa na mwelekeo wa kidini hasa ikizingatiwa kuwa Waarmenia ni Wakristo wa madhehebu ya Orthodox, wakati idadi kubwa ya raia wa Azerbaijan ni Waislamu.