Bayern wachechemea katika Bundesliga
10 Januari 2022![Deutschland München | Bundesliga | Tor Florian Neuhaus](https://static.dw.com/image/60363955_800.webp)
Hii ni baada ya Dortmund kupata ushindi wa 3-2 walipokuwa wakichuana na Eintracht Frankfurt ugenini. Bayer Leverkusen walikuwa nyumbani ila walilazimishwa sare ya magoli mawili walipokuwa wakikwaana na Union Berlin ambayo imempoteza mshambuliaji wao mahiri raia wa Nigeria Taiwo Awoniyi ambaye ameelekea kujiunga na timu yake ya taifa ya Nigeria kushiriki mashindano ya Kombe la Mataifa Barani Afrika huko Cameroon.
Hapo Jumapili FC Cologne waliwaadhibu Hertha Berlin magoli matatu kwa moja huko mjini Berlin Anthony Modeste akifunga goli la kwanza na lake la kumi na mbili la Bundesliga msimu huu. VfL Bochum walikuwa nyumbani na wakawazidi kete Wolfsburg 1-0 na kuwasogeza nafasi moja nyuma ya timu kumi bora kwenye msimamo wa Bundesliga.
Kwa sasa Bayern ndio walio uongozini wakiwa na pointi 43 Borussia Dortmund ni wa pili pointi zao zikiwa 37 halafu TSG Hoffenheim wamekwea hadi katika nafasi ya tatu wakiwa na pointi 31. Chini ya jedwali Augsburg, Arminia Bielefeld na Greuther Fürth ndio wanaovuta mkia.