Waziri wa mambo ya nchi za nje wa Marekani Antony Blinken amesema kiongozi huyo mpya wa Hamas Yahya Sinwar, ana jukumu la kuhakikisha makubaliano ya kusitisha mapigano yanafikiwa kwa lengo la kuleta amani ya Mashariki ya kati. Lakini licha ya kauli hiyo bado kuna wasiwasi wa kuzuka kwa vita zaidi baada ya Israel kukasirishwa na uteuzi huo. Kupitia waziri wake wa mambo ya nje Israel Katz, Israel imesema uteuzi huo ni sababu nyengine kuu ya kuendelea kulitokomeza kundi hilo la Hamas kutoka katika uso wa dunia.

Yahya Sinwar aliteuliwa siku ya Jumanne kuwa kiongozi mkuu wa kisiasa wa kundi la wanamgambo la Hamas. Sinwar anadaiwa kupanga shambulizi la Oktoba 7 lililofanyika Kusini mwa Israel na kuchochea mgogoro unaoendelea kati ya Israel na kundi hilo mjini Gaza. Sinwar amechukua nafasi ya Ismail Haniyeh aliyeuwawa Julai 31 mjini Tehran katika shambulizi linalodaiwa kufanywa na Israel.

Hamas yamteua Yahya Sinwar kuchukuwa nafasi ya Haniyeh

Mauaji hayo ambayo Iran inainyooshea kidole cha lawama Israel, yamesababisha hofu katika kanda nzima ya Mashariki ya Kati huku mashambulizi ya kulipiza kisasi yakitarjiwa. Wasiwasi pia umetanda ndani ya kanda hiyo baada ya Israel kumuua kamanda wa kundi la Hezbollah nchini Lebanon wiki iliyopita.

Hamas yasema bado ipo Imara

Kwa upande wake Hamas imesema uteuzi wa Sinwar unatoa Ujumbe mzito kwa Israel kwa Hamas bado ni imara na inaendelea na operesheni zake. Washirika wa kundi hilo, wanamgambo wa Hezbollah walioko Lebanon, wamempongeza kiongozi huyo wa Hamas, wakisema uteuzi wake unathibitisha kuwa adui ameshindwa kufanikisha lengo lake kwa kumuua Haniyeh na maafisa wengine wa Hamas.

Wakati hofu ya machafuko zaidi ikizidi kutanda katika eneo la Mashariki ya Kati kufuatia Hezbollah na Iran kuapa kulipiza kisasi mauaji ya Haniyeh pamoja na Kamanda wao Fuad Shukr, kiongozi wa kanisa Katoliki duniani Papa Francis, amehimiza pande zote kuwa na uvumilivu na kutoa wito wa makubaliano ya amani kufikiwa haraka. 

Uturuki kujiunga kesi ya mauaji ya kimbari dhidi ya Israel

Huku hayo yakiarifiwa rais wa Iran Masoud Pezeshkian amesema amezungumza na Rais wa Ufaransa Emmanuel Macron na amemueleza kwamba, kama mataifa ya Magharibi yana nia ya kweli ya kusitisha vita, ni lazima yailazimishe Israel kuachana na mauaji ya halaiki inayotekeleza Gaza na kuridhia makubaliano ya kusitisha mapigano. Pezeshkian amesema Jamhuri hiyo ya kiislamu kamwe haitokuwa kimya, kutakapokuwa na hatua za kichokozi au kitisho cha usalama wake na matakwa yake.

Kwengineko jeshi la Israel limetoa amri mpya kwa wapalestina kuondoka katika maeneo ya Kaskazini mwa Gaza ambayo yalikuwa ya kwanza kulengwa mwanzoni mwa vita vya Israel na Hamas mnamo Oktoba 7.

Chanzo: ap,afp, reuters