Aboubakar alifunga mikwaju miwili ya penalti kunako kipindi cha kwanza baada ya Gustavo Sangare kuufunga goli la kwanza la michuano hiyo na kuwapa uongozi Waburkinabe katika mechi hiyo ya kundi A.

Burkina Faso walipata pigo kabla ya mechi hiyo baada ya kocha wao kamou Malo na wachezaji kadhaa kuambukizwa virusi vya corona hatua iliyopelekea naibu wake Firmin Sanou kuiongoza timu hiyo katika mechi yao ya kwanza.

Mashabiki wa Cameroon wameelezea furaha yao kwa timu yao kupata ushindi wao wa kwanza katika kinyang'anyiro cha mwaka huu katika udongo wa nyumbani.

"Ni furaha kwetu kushinda pointi tatu za kwanza. Ni heshima kuu kuandaa mashindano haya baada ya miaka mingi na iwapo Cameroon itashinda tutajivunia sana. Nina furaha isiyo kifani," alisema Ayessi Orelene.

Katika mechi ya pili ya kundi hilo Jumapili Cape Verde walipata ushindi mwembamba wa moja bila walipokuwa wakicheza na Ethiopia ambayo ilipata pigo kwa kuwa kunako kipindi cha kwanza mchezaji wao Yared Bayeh alionyeshwa kadi nyekundu baada ya dakika kumi na mbili tu.