Waziri Mkuu wa Israel Benjamin Netanyahu amepoteza mshirika mwingine katika serikali yake ya muungano baada ya chama cha Shas kuripotiwa kujiondoa serikalini jana Jumatano. Hayo yanatokea wakati mzozo kuhusu utumishi wa kijeshi wa lazima kwa wanaume wa Kiorthodox wenye imani kali ukizidi kufukuta.Serikali ya Netanyahu yakabiliwa na kitisho cha kusambaratika

Kulingana na vyombo vya habari vya Israel, chama cha Kiorthodox chenye misimamo mikali cha Shas, kimetangaza kuachia nyadhifa zake zote serikalini lakini kimesisitiza kwamba hakijiungi na upinzani.

Kiongozi wa upinzani Yair Lapid alidai kuwa Israel inaongozwa na serikali ya wachache kufuatia kujiondoa kwa Shas, huku baadhi ya vyombo pia vikiripoti kuwa serikali ya Netanyahu imepoteza wingi wake bungeni.

Kujiondoa kwa chama cha Shas serikalini, kunakuja baada ya chama kingine cha itikadi kali cha Kiorthordox cha United Torah Judaism, kujitenga na serikali siku moja kabla kwa suala hilo hilo.