Nchini Jamhuri ya Kidemokrasia ya Kongo, chama tawala cha Rais Félix Tshisekedi, UDPS, hakiwezi kurudi nyuma katika mtazamo wake wa kubadili katiba.

Viongozi wa UDPS wanadai kwamba katiba ya mwaka 2006 imekuwa kikwazo katika kukabiliana na changamoto za kisasa, huku mbunge Adolphe Amisi Makutano akisisitiza kuwa ni wakati muafaka kwa Wakongo kufikiria katiba mpya isiyo na mapungufu.

Ni Nini Kinatukabili?

Makutano anaeleza kwamba kifungu 217 kinaruhusu kukabidhi maeneo kwa nchi jirani kwa lengo la amani, akihusisha hali ya mashariki mwa Kongo na uwezekano wa madai kutoka Rwanda. Anasema, "Najua watu wenye nia mbaya wanajihusisha na muhula wa rais, lakini si hivyo."

Upinzani unajiuliza sababu za mabadiliko haya, hasa ikizingatiwa kwamba katiba ya sasa iliruhusu kubadilishana mamlaka kwa amani kwa mara ya kwanza nchini Kongo.

Soma pia:Baada kutangazwa mshindi, Tshisekedi anao mlima mrefu wa kupanda 

Wanamshuku Rais Tshisekedi kwa nia ya kubakia madarakani, huku chama cha PPRD cha rais wa zamani Joseph Kabila kikipinga vikali hatua hii.

Ferdinand Kambere, naibu katibu mkuu wa PPRD, anasema, "Haikubaliki. Kuna ukosefu wa usalama kila mahali. Kutaka kubadili katiba ni ujanja tu."

Wachambuzi hawaoni ubaya na hilo

Wapinzani wengine, kama Moïse Katumbi na Delly Sessanga, pia wamekemea jaribio hili. Hata hivyo, baadhi ya wachambuzi hawaoni ubaya katika marekebisho ya katiba kupitia tume ya wataalam, wakisisitiza kuwa raia wanapaswa kuwa na neno la mwisho.

Profesa Nkere Ntanda kutoka Chuo Kikuu cha Kinshasa anasema, "Katiba mpya itapaswa kuwasambazia Wakongo umuhimu wake na faida zake."

Hali ya mgawanyiko inashuhudiwa miongoni mwa Wakongo, kati ya wale wanaoamini katiba ya sasa ni bora na wale wanaoshawishika kuwa ni muhimu kuifanya iendane na hali halisi ya sasa.