Wito wa mpango wa kufufua uchumi wa Ulaya watolewa
6 Aprili 2020![EU Ursula von der Leyen](https://static.dw.com/image/52991503_800.webp)
Rais huyo wa halmashauri ya Umoja wa Ulaya amezitaka nchi wanachama wa Umoja huo ziwekeze mabilioni ya fedha ili kuepusha madhara makubwa katika uchumi yaliyosababishwa na janga la maambukizi ya virusi vya corona.
Bibi Ursula von der Leyen amesema katika makala aliyoandika kwenye gazeti la "Welt am Sonntag" kwamba Umoja wa Ulaya unahitaji mpango maalumu wa kujenga upya uchumi, kama ule ulioanzishwa na Marekani barani Ulaya na kutekelezwa kuanzia mwaka 1948 hadi 1952.
Ameeleza kuwa bajeti ya Umoja wa Ulaya imekubaliwa na nchi zote wanachama kama njia ya kuondosha tofauti katika moyo wa mshikamano, na kwamba sasa fedha hizo zinapaswa kutumiwa kwa ajili ya kukabiliana na mgogoro uliopo.
Ameeleza katika makala hiyo kwamba mabilioni ya fedha zitakazoekezwa ili kuepusha maafa makubwa zitaleta mshikamamo wa marika yote yafuatayo. Amesema janga la corona linaweza kuwa fursa ya kufufua hisia za mshikamano miongoni mwa mataifa ya Ulaya.
Hatua za kiuchumi za haraka zinapaswa kuchukuliwa mara moja
Waziri Mkuu wa Uhispania Pedro Sanchez ameunga mkono kuanzishwa kwa mpango huo wa kufufua uchumi, kama ule uliotekelezwa barani Ulaya baada ya kumalizika vita vikuu vya pili. Waziri mkuu wa Uhispania pia amezitaka nchi za Ulaya zichukue hatua za kiuchumi za haraka kana kwamba zimo vitani.
Sanchez amesema barani Ulaya zinahitajika hatua za kiulinzi, ujenzi mpya na mpango wa kuufufua uchumi na kwamba hatua hizo zinapaswa kuchukuliwa mara moja kwa lengo la kuzisaidia nchi zilizoingia katika madeni kutokana na janga la maambukizi ya virusi vya corona.
Bwana Sanchez amesema virusi vya corona havikuchagua nchi na kwa hivyo mfuko wa fedha utapaswa kuleta manufaa kwa wote na kwamba mgogoro uliopo unaweza kuwa fursa ya ujenzi mpya wa Umoja wa Ulaya wenye nguvu kubwa zaidi.
Umoja huo kwa sasa umetingwa na mjadala juu ya njia za kukabaliana na mzigo wa madeni miongoni mwa nchi wanachama. Mawaziri wa fedha wa jumuiya hiyo wanatarajiwa kukutana hapo kesho Jumanne kujadili juu ya fedha za jumuiya yao wakati huu wa kukabiliana na janga la corona.
Chanzo:/ https://p.dw.com/p/3aTD8
Mhariri: Iddi Ssessanga