England imeigaragza jirani yake Ireland Kaskazini kwa kuipiga mabao 5-0 kwenye mechi ya mwisho ya awamu ya makundi na kujihakikishia ushindi wa kishindo kuelekea robo fainali ya michuano ya soka ya wanawake barani Ulaya.
Picha: Harriet Lander/Getty Images
Matangazo
Wenyeji England wameendelea kukanyaga mafuta kwenye michuano ya Euro ya Wanawake kwa kuilaza Ireland ya Kaskazini mabao 5-0 katika mechi ya mwisho ya kundi A siku ya Ijumaa, licha ya kuwa tayari wamefuzu hatua ya robo fainali wakiwa usukani mwa kundi lao.
Kikosi hicho cha Sarina Wiegman kilikuwa kimejihakikishia nafasi ya kucheza nane bora kwa ushindi wa 8-0 dhidi ya Norway siku ya Jumatatu lakini wakaendeleza kasi hiyo katika mechi yao kwenye Uwanja wa St Mary's dhidi ya wapinzani kutoka ng'ambo ya bahari ya Ireland.
Mshambulizi wa Chelsea, Fran Kirby alifungua karamu ya mabao kwa shuti kali dakika ya 40 kabla ya Beth Mead kunyakua bao lake la tano kwenye michuano hiyo muda mfupi baadae na kumpeleka nafasi ya kwanza kwenye orodha ya wafungaji.
Wachezaji wa timu ya wanawake ya England wakisherehekea moja ya mabao yao dhidi ya Ireland Kaskazini, mjini Southampton, Julai 15, 2022.Picha: Lisi Niesner/REUTERS
Ireland Kaskazini, ambayo ndiyo timu inayoshika mkia kiviwango kwenye michuano ya Euro, ilifanya kila iwezalo kuzuia wimbi la Uingereza lakini shuti kali la haraka kutoka kwa Alessia Russo muda mfupi baada ya kipindi cha mapumziko liliharibu matumaini waliyokuwa nayo ya kubakisha mabao chini.
Jioni ilizidi kuwa mbaya kwa kikosi cha Kenny Shiels baada ya jaribio la kuondosha shuti la Kelsie Burrows dakika ya 75 kumpita kipa Jacqueline Burns na kutinga wavuni mwake na kufanya mabao kuwa 5-0 kwa England.
Austria yaiondoa Norway, yaweka miadi na Ujerumani robo fainali
Katika mechi nyingine iliyochezwa jana usiku, Norway ilitolewa kwa mshtuko kwenye michuano hiyo baada ya washindani hao wa taji kabla ya kinyang'anyiro kuambulia kichapo cha bao 1-0 dhidi ya Austria.
Licha ya kuwepo kwa nyota wa Lyon Ada Hegerberg katika kikosi chao, mabingwa wa zamani wa Ulaya Norway walilipa gharama kwa kuonyesha mchezo mwingine usiovutia mjini Brighton.
Norway ilishindwa kusonga mbele kutoka Kundi A baada ya kushindwa kwa mara ya pili mfululizo, huku Austria ikifuzu kucheza robo fainali kama washindi wa pili nyuma ya England.
Wachezaji wa Austria wakishangilia bao lao la pekee dhidi ya Norway mjini Brighton, England, Julai 15, 2022.Picha: Pedro Soares/SheKicks/SPP/IMAGO
Wakihitaji ushindi ili kwedna juu ya Austria katika mechi yao ya mwisho ya kundi, Norway walianza kuonyeshwa mlango wa kuaga michuano hiyo baada ya dakika 37 wakati Nicole Billa alipofunga kwa kichwa krosi ya Verena Hanshaw.
Wanorway hawakuweza kurejea na ni Austria ambao wangeweza kushinda kwa tofauti kubwa kutokana na umaliziaji bora.
Kipa wa Norway Guro Pettersen aliokoa mara kadhaa ili kuipa timu yake nafasi, lakini Manuela Zinsberger wa Austria aliwazuia Celin Bizet na Hegerberg katika hatua za mwisho.
Wakicharazwa 8-0 na England katika mchezo wao wa awali, michuano ya Norway iligeuka kuwa shubiri baada ya matumaini ya awali yaliyochochewa na ushindi wa 4-1 dhidi ya Ireland Kaskazini katika mechi yao ya kwanza ya kundi.
Michuano ya Euro 2022 kwa wanawake: Timu za kutizamwa
Michuano ya soka ya Euro kwa wanawake imeanza rasmi huko England ikitarajiwa kuwa na ushindani mkali kwasababu ya timu zenye wachezaji mahiri. Na hizi ndio zinapewa nafasi kubwa ya kupiga soka safi.
Picha: imago images/Bildbyran
Ujerumani
Kikosi cha Martina Voss-Tecklenburg kimesheheni wachezaji kutoka klabu kubwa za Ulaya. Ujerumani itajumuisha wachezaji kinda na wenye uzoefu, lengo ni kufika hadi nusu fainali. Sara Däbritz, ambaye amejiunga na mabingwa wa Ulaya klabu ya Lyon, atatafuta kushinda kombe la kwanza kubwa la Ujerumani tangu mwaka 2013. Lakini hata hivyo kikosi hicho kitamkosa Dzsenifer Marozsan kutokana na majeraha.
Picha: Christof Koepsel/Getty Images
Norway
Baada ya kutolewa katika hatua ya makundi ya mashindano ya Euro mwaka 2017, Norway inatafuta kurejesha rekodi safi katika mashindano ikiwa imeshinda mara mbili na kufika fainali mwaka 2013. Ada Hegerberg, mshindi wa kwanza wa kiatu cha dhahabu- Ballon d’Or kwa wanawake 2018, amerejea viwanjani baada ya kukosekana kwa miaka mitano akipinga ukosefu wa usawa katika shirikisho la soka la Norway FA.
Picha: FRANCK FIFE/AFP
Ufaransa
Baada ya kushindwa katika kombe la dunia la 2019 nyumbani, kikosi cha Corinne Diacre kitataka kujiimarisha. Inaweza kuwa vigumu kutokana na kukosekana kwa wachezaji mahiri kama vile Amandine Henry na Eugenie Le Sommer, ambao wameachwa kwenye kikosi. Beki mwenye uzoefu Wendie Renard, wa mabingwa watetezi wa Champions League Lyon, anaongoza timu yenye uzoefu mwingi wa ushindi katika ngazi ya klabu.
Picha: IMAGO/Pro Sports Images
Uholanzi
Mabingwa hao watetezi wa ligi ya mabingwa Ulaya watajaribu kutetea ubingwa wao nchini Uingereza, wakati huu ambapo mwingereza Mark Parsons akishika usukani. Mshambuliaji nyota wa Arsenal, Vivianne Miedma ambaye ndiye mfungaji bora wa mabao katika timu ya taifa ya Uholanzi, anatarajiwa kuiongoza timu hiyo katika hatua za mwisho za michuano hiyo.
Picha: Maurice van Steen/ANP/imago images
England
Wenyeji wa michuano hiyo wanajiona kuwa miongoni mwa washindani wakuu. Kikosi hiki kimeundwa kwa kiasi kikubwa na wachezaji kutoka ligi kuu ya wanawake inayokua kwa kasi, pamoja na vilabu vikubwa vya Uropa. Beki wa pembeni Lucy Bronze amechezea klabu kadhaa kubwa na za hali ya juu na atakuwa akitafuta kupata taji la kwanza kuu kwa England baada ya kukubali ofa ya kuichezea Barcelona muhula ujao.
Picha: IMAGO/Pro Sports Images
Uhispania
Wakiwa na kikosi kilichoundwa na takriban vipaji vyote vya La Liga, wachezaji wa Jorge Vilda watatafuta kupata taji la kwanza kabisa la Uropa katika mashindano ya wanawake. Alexia Putellas wa Barcelona, anayechukuliwa na wengi kama mchezaji bora zaidi duniani, ndiye anayetazamwa.
Picha: Luis de la Mata/picture alliance
Sweden
Ikiwa na wachezaji wengi kwenye vilabu vikuu vya Ulaya na historia nzuri, Sweden ni moja ya timu za kutazama kwenye mashindano ya Euro. Washindi wa medali ya fedha kutoka Michezo ya Olimpiki ya Beijing watatarajia kushinda kombe kuu kwa ajili ya nchi yao kwa mara ya kwanza tangu kushinda Euro 1984. Kiwango kizuri cha Fridolina Rolfö kutoka Barcelona kinaweza kuwasaidia katika kufikia lengo lao.
