Kiwango cha mionzi kimeongezeka kwenye kinu cha nyuklia nambari 2 cha Fukushima nchini Japan.

Kwa mujibu wa wahusika kiwango hicho kimevuka kile cha kawaida mara milioni kumi.Wafanyakazi waliokuwa wanajaribu kukirebisha kinu hicho kilichoharibika sana baada ya kukumbwa na maafa wamelazimika kuondolewa na kupelekwa kwenye sehemu salama.

Kampuni inayokiendesha kinu hicho, ya Tokyo Electric, TEPCO imearifu kuwa maji yalioingia mionzi yamo chini ya injini iliyopo katika jengo lililounganishwa na kinu hicho nambari 2.Kinu hicho kilichopo Fukushima kiliharibiwa vibaya kutokana na mitetemeko ya ardhi na Tsunami wiki mbili zilizopita.Kampuni ya TEPCO imejaribu kuyaondoa maji yaliyoingia mionzi ya nyuklia kwenye vinu vinne vya Fukushima.

Wakati huo huo mashirika ya habari yamearifu kuwa hatari ya kutokea maafa makubwa ya kuyeyuka kwa nyuklia bado ingalipo.