Kwa kushirikiana na mashirika ya ujasusi ya Marekani na washirika wengine wa kimataifa, idara ya ujasusi ya Ujerumani imebainisha kwamba makundi yanayohusiana na idara ya ujasusi ya jeshi la Urusi GRU, yanayojulikana kwa jina la namba 29155, yamefanya hujuma za kimtandao dhidi ya jumuiya ya kujihami ya NATO na dhidi ya nchi za Umoja wa Ulaya.

Kwa mujibu wa idara ya ujasusi ya Ujerumani, makundi hayo ya Urusi yamekuwa yanafanya mashambulio hayo kimtandao, tangu mwaka 2020, kwa malengo ya kijasusi, hujuma, na kuzichafulia majina nchi nyingine.