Serikali ya Iran itaamua tu kuhusu ushiriki wa timu ya taifa katika Kombe la Dunia mara tu itakapopokea jibu kutoka FIFA kuhusu kuhamishwa kwa mechi zao. Hayo yamesemwa na Waziri wa Michezo wa nchi hiyo Ahmad Donyamali.

Shirikisho la mpira wa miguu la Iran (FFIRI) limekuwa likishinikiza kuhamishwa kwa mechi tatu za hatua ya makundi za Kombe la Dunia za timu hiyo kutoka Marekani hadi Mexico, likitaja kuhusika kwa jeshi la Marekani pamoja na Israel katika mashambulizi yaliyosababisha vita vinavyoendelea katika eneo hilo.

FFIRI ilisema mwezi uliopita kuwa wako katika mazungumzo na FIFA kuhusu mabadiliko ya uwanja, huku wizara ya michezo ya Iran ikipiga marufuku timu za michezo za kitaifa na vilabu kusafiri kwenda nchi ambazo inaziona kuwa maadui hadi itakapotangazwa tena.

Rais wa FIFA Gianni Infantino alisema wiki iliyopita, hata hivyo, kwamba Iran itacheza mechi zake kama ilivyopangwa. "Ombi letu kwa FIFA kuhamisha michezo ya Iran kutoka Marekani hadi Mexico bado ni halali, lakini bado hatujapata jibu," Donyamali aliambia shirika la habari la serikali ya Uturuki Anadolu katika mahojiano yaliyochapishwa mwishoni mwa wiki.

"Ikiwa litakubaliwa, ushiriki wa Iran katika Kombe la Dunia utakuwa wa uhakika. Hata hivyo, FIFA bado haijajibu." "Kama Waziri wa Michezo, pamoja na shirikisho la soka la Iran, tutaiandaa timu ya soka kwa ajili ya Kombe la Dunia. Hata hivyo, uamuzi wa mwisho utafanywa na serikali yetu."

Iran imepangwa kucheza mechi zake zote za Kundi G katika ardhi ya Marekani -- dhidi ya New Zealand na Ubelgiji mjini Los Angeles kabla ya mechi yao ya mwisho dhidi ya Misri mjini Seattle.

Rais wa Marekani Donald Trump alisema mwezi uliopita kwamba ingawa timu ya taifa ya Iran inakaribishwa kucheza nchini Marekani, huenda lisiwe jambo jema kwa "maisha na usalama wao".

Baadaye aliweka wazi kwamba tishio lolote kwa wachezaji halitatoka Marekani. "Kulingana na kanuni husika za FIFA, usalama lazima utolewe na nchi mwenyeji," Donyamali aliongeza. "Hata hivyo, Kombe la Dunia linafanyika hivi karibuni, na kutoa hakikisho la usalama katika kipindi hiki ni jambo la kutiliwa shaka."

Reuters