Iran imeliambia shirika la Umoja wa Mataifa kwamba inakusudia kuongeza kurutubisha madini ya urani kwa asilimia 20 hatua ambayo Marekani imeiita kuwa ni uchokozi. Hatua hiyo itaifanya Iran izidi kukiuka mkataba wa nyuklia iliyoutia saini wakati wa utawala wa Rais Barack Obama mnamo mwaka 2015.

Soma Zaidi:Marekani, Iran zatofautiana katika kuyafufua makubaliano ya mpango wa nyuklia

Mkataba huo unapiga marufuku shughuli zote za urutubishaji kwa sababu hiyo ndiyo njia ya kuelekea kwenye kuunda silaha za nyuklia. Msemaji wa wizara ya mambo ya nje ya Marekani, Ned Price amesema uamuzi wa Iran unaleta wasiwasi.

Msemaji huyo ameeleza kuwa Iran inachukua hatua nyingine ya kusikitisha ya kurudi nyuma na hasa ikitiliwa maanani kwamba Marekani imethibitisha nia ya dhati ya kurejea kwenye mkataba na kutafuta njia za kudumu katika kuyatatua masuala ya nyuklia.

Price ameitaka Iran iachane na sera za maguvu na kurejea kwenye mazungumzo ya mjini Vienna yaliyokwama mwezi uliopita. Nchi za Ulaya nazo zimepaza sauti na kuitaka Iran iachane na nyendo za kurudi nyuma. Ujerumani, Ufaransa na Uingereza zimeungana na Marekani kwa kutoa tamko linaloelezea wasiwasi juu ya mipango ya Iran.

Ujerumani, Ufaransa na Uingereza zimesema hatua zinazochukuliwa na Iran zinayahatarisha mazungumzo yenye nia ya kuufufua mkataba wa nyuklia wa mwaka 2015.

Nchi hizo pamoja na Marekani zilizotia saini mkataba huo, zimesema Iran haina ulazima wa kufanya utafiti huo. Hata hivyo Iran imejitetea kwa kueleza kwamba utafiti inaoufanya ni kwa ajili ya mahitaji ya tiba na pia kwa ajili ya kupata nyenzo za kufanyia utafiti kwenye kinu chake cha nyuklia.

Mkataba wa nyuklia na Iran ulienda kombo baada ya Marekani chini ya utawala wa Donald Trump kujiondoa mnamo mwaka 2018.

Vyanzo:DPA/AFP/ https://p.dw.com/p/3w7jE