Katika siku ya pili ya kuisikiliza kesi iliyowasilishwa na Afrika ya Kusini, Naibu Mwanasheria Mkuu wa Israel Gilad Noam amesema kuwa kesi hiyo haina hoja za msingi.

Naibu Mwanasheria Mkuu wa Israel Gilad Noam, amedai kuwa Israel imetimiza majukumu yake yote ya kisheria. Wakati Israel ikijitetea Ijumaa dhidi ya tuhuma za Afrika ya kusini zinazodai kuwa inafanya vitendo sawa na mauaji ya kimbari kwenye Ukanda wa Gaza, mwakilishi wa Israel katika kesi hiyo Galit Raguan ametetea juhudi za nchi hiyo za kupunguza madhara kwa raia na kutolea ufafanuzi kuhusu hali ya kiutu katika Ukanda huo.

Soma zaidi: Israel yajibu tuhuma za Afrika ya Kusini mbele ya ICJ

Raguan amekanusha tuhuma za kufanya mauaji ya halaiki kwa makusudi  na kudai kuwa Israel ilichelewesha mashambulizi ya kijeshi ya ardhini kwa wiki kadhaa ili kuwaruhusu raia wa Gaza kutafuta maeneo salama. Mwakilishi huyo wa Israel amezungumzia pia uwekezaji katika rasilimali uliofanywa na Israel ili kuwapa raia maelezo kuhusu mahala pa kwenda na namna ya kuondoka kwenye sehemu zenye mapigano.

Alihitimisha kwa kusema kuwa, juhudi za Israel za kupunguza madhara ya vita kwa raia ni kinyume cha kufanya uharibifu kwa kukusudia na hivyo kuzifanya tuhuma za mauaji ya halaiki kwa kusudia kukosa uzito.

WHO: Hospitali ya Al-Shifa imerejesha sehemu ya huduma zake

Kwingineko, Shirika la Afya Duniani WHO limesema kuwa Hospitali kubwa zaidi katika Ukanda wa Gaza ya Al-Shifa, iliyoaharibiwa na vita vya Israel dhidi ya Hamas, imeanza kurejesha sehemu ya huduma zake.

Soma zaidi: Afrika Kusini yaishutumu Israel kwa mauaji ya kimbari

Naye mkuu wa Shirika la Afya Duniani WHO  Tedros Gebreyesus kupitia mtandao wa X amesema kuwa kwa sasa hospitali hiyo ya Al Shifa iliyositisha huduma zake kwa kiasi kikubwa mwezi Novemba baada ya operesheni za kijeshi za Israel sasa ina wahudumu wa afya 60. Amesema hospitali hiyo ina wodi ya upasuaji na matibabu yenye vitanda 40, kitengo cha dharura na vyumba vinne vya upasuaji na khuduma za kina mama.