Jeshi la Israel limesema limepokea mabaki ya mateka wanne waliokabidhiwa na Hamas Jumanne, katika hatua nyingine ya utekelezaji wa makubaliano ya kusitisha mapigano yaliyosimamiwa na Rais wa Marekani Donald Trump. Miili hiyo ilikabidhiwa kwa Msalaba Mwekundu kabla ya kupelekwa Israel kwa ajili ya uchunguzi wa kitabibu.

Siku moja kabla, Hamas ilikuwa imekabidhi mabaki ya mateka wanne wengine, saa chache baada ya kuachilia mateka 20 walio hai chini ya makubaliano hayo ya amani. Jeshi la Israel lilisema makubaliano hayo ni sehemu ya mpango mpana wa kurejesha amani na kumaliza vita vya miaka miwili katika Ukanda wa Gaza.

Miili ya mateka wa Kipalestina yakabidhiwa pia

Wakati huo huo, hospitali ya Nasser Medical Centre huko Gaza imesema imepokea miili ya Wapalestina 45 waliokuwa wakihifadhiwa na Israel. Kulingana na mpango huo, Israel inatakiwa kurejesha miili ya Wapalestina 15 kwa kila Mwizraeli aliyefariki vitani.

Waziri Mkuu Benjamin Netanyahu amesema serikali yake itaendelea na juhudi za kuhakikisha "mateka wote wanarudi nyumbani,” huku familia zikisubiri kwa wasiwasi. Rais Trump kupitia mtandao wa X alisema, "Mzigo mkubwa umeondoka, lakini kazi haijaisha — awamu ya pili inaanza sasa.”