Majaribio hayo yamejiri wakati Waziri wa Mambo ya Nje wa Japan Takeshi Iwaya akiwa ziarani Korea Kusini kwa mfululizo wa mikutano na maafisa waandamizi, huku majirani zake hao wa Asia wakitaka kuimarisha uhusiano baina ya nchi hizo kabla ya rais wa Marekani Donald Trump kuingia madarakani wiki ijayo.

Soma pia:Korea Kaskazini yafanya majaribio ya makombora mapya ya masafa mafupi 

Jeshi la Seoul limesema liligundua makombora kadhaa ya masafa mafupi yaliyofyatuliwa kuelekea Bahari ya Mashariki. Kaimu rais wa Korea Kusini Choi Sang-mok amekemea urushaji huo wa makombora, akisema unakiuka maazimio ya Baraza la Usalama la Umoja wa Mataifa.

Amesema Seoul itajibu vikali vitendo vya uchokozi vinavyofanywa na Korea Kaskazini kwa kuzingatia uwezo wake thabiti wa usalama na ushirikiano na Marekani. Watalaamu wanasema urushaji huo wa karibuni huenda unanuia kutuma ujumbe kwa utawala unaokuja wa Trump.