Kocha wa klabu inayoshiriki Ligi Kuu ya England Liverpool, Jurgen Klopp, amesema anahisi ni kama jambo jipya kwake yeye kama kocha kufuzu kwa mara ya nne katika fainali ya Ligi ya Mabingwa Barani Ulaya Champions League.

Klopp ameyasema haya baada ya Liverpool kutoka chini magoli mawili na kupata ushindi wa 3-2 dhidi ya Villareal katika mechi yao ya nusu fainali mkondo wa pili usiku wa kuamkia leo.

Liverpool wamefuzu kwa jumla ya magoli 5-2 baada ya kushinda 2-0 nyumbani kwao Anfield Jumatano iliyopita.

Miamba hao wa England wanaelekea mjini Paris ambapo fainali hiyo itachezwa wakiwa wanatarajia kupatana ama na Manchester City au Real Madrid ambao mechi yao ya mkumbo wa pili wataicheza usiku wa leo huko Madrid.

City walishinda mechi ya kwanza mjini Manchester kwa mabao 4-3.