Macron amesema utawala wa kimabavu unaweka kitisho kikubwa kwa mustakabali wa Ulaya, akitolea mfano wa kuongezeka kwa vyama vya siasa kali za mrengo wa kulia.

Huku akitaja vita vinavyoendelea nchini Ukraine, Macron amesema Ulaya iko katika njia panda. Amesema kuwa amani, ustawi na demokrasia viko chini ya kitisho kama viongozi hawatachukua hatua.

Soma pia: Macron aupongeza ushirikiano wa Ufaransa na Ujerumani

Macron alitoa hotuba yake katika kanisa maarufu la Frauenkirche mjini Dresden. Kanisa hilo linaashiria uharibifu uliofanywa wakati wa Vita Vikuu vya Pili vya Dunia na baadae kuunganishwa tena kwa Ujerumani baada ya kumalizika Vita Baridi. Macron awali aliyatembelea makumbusho ya mauaji ya halaiki ya Wayahudi, Holocaust, mjini Berlin, ambako alitoa heshima zake kwa Wayahudi milioni 6 waliouawa na Manazi.

Hii leo Macron anatarajiwa kuhitimisha ziara yake ya kiserikali ya siku tatu, kwa kuelekea magharibi mwa Ujerumani kukitembelea chuo kikuu cha Münster anakotarajiwa kutunukiwa tuzo ya amani ya kimataifa ya Westphalia.