Katika taarifa yake iliyochapishwa jana, Jeshi la Mali limesema vikosi vyake kwenye mkoa wa mashariki wa Menaka "vimemkamata Ahmad Ag Ditta" iliyemtaja kuwa kiongozi wa tawi la kundi la IS kanda ya Sahel linalofahamika kwa kifupi kama EIGS.

Limedai kwamba Ditta "anahusika na uhalifu mkubwa dhidi ya raia wasio na hatia, na ndiye mratibu wa mashambulizi dhidi ya vikosi vya jeshi la nchi hiyo".

Jeshi pia limesema kwenye operesheni yake limefanikiwa kuwaua wapiganaiji wa EIGS na kukamata vifaa kadhaa vya kijeshi ikiwemo mabomu yanayoundwa kienyeji.

Mali, taifa la Afrika Magharibi, linakabiliwa na mzozo wa kisiasa, kiusalama na kiuchumi na tangu mwaka 2012 linapambana na uasi wa wapiganaji wenye mafungamano na makundi mawili ya itikadi kali ya IS na Al-Qaeda.