Matokeo ya tume ya uchaguzi kutoka majimbo hayo yanaonesha Tinubu wa chama cha All Progressives Congress, APC, akiwa mbele na karibu asilimia 36 au milioni 7 ya kura halali zilizohesabiwa, naye Atiku Abubakar wa chama kikuu cha upinzani, Peoples Democratic, PDP, akimfuata kwa karibu na asilimia 30 au karibu milioni 6 ya kura halali.

Peter Obi wa chama kidogo cha Labour ana asilimia 20 au karibu milioni 3.8. Matokeo zaidi yanatarajiwa kumuonyesha mshindi baadaye leo. Vyama vya upinzani vinapinga matokeo hayo vikisema yalitokana na mchakato uliokumbwa na udanganyifu ikiwemo matatizo ya kiufundi kutokana na mfumo mpya wa teknolojia ulioletwa na tume ya uchaguzi.