Kansela Angela Merkel wa Ujerumani na Rais Vladmir Putin wa Urusi wanafanya mazungumzo mjini Moscow wakati mgogoro ukiendelea kufukuta Afghanistan,
Picha: Michael Kappeler/dpa/picture alliance
Matangazo
Masuala mengine yanayotarajiwa kuibuka katika mkutano huo ni mradi wa bomba la gesi kati ya Urusi na Ujerumani unaopingwa na Marekani, ukandamizaji wa upinzani nchini Belarus na madai kuwa serikali ya Belarus inawalazimisha wahamiaji kuingia Latvia, Lithuania na Poland kwa lengo la kuudhoofisha Umoja wa Ulaya.
Ziara ya Merkel mjini Moscow inakuja wakati Kansela huyo akikaribia mwisho wa uongozi wake wa karibu miaka 16 wa Ujerumani. Yeye na Putin, ambaye amehudumu kama rais wa Urusi au waziri mkuu tangu 2000, walimudu kuweka mawasiliano ya mara kwa mara kwa miaka mingi licha ya tofauti zao nyingi za kisiasa.
Hata hivyo, uhusiano wa kibinafsi kati ya viongozi hao umezorota tangu 2014, wakati Urusi ilipochukua kwa nguvu Rasi ya Crimea nchini Urusi na kuwaunga mkono waasi wanaopigania kujitenga mashariki mwa Ukraine, na pia vitendo vingine vya kimabavu vya Moscow.
Nyakati nzuri na mbaya walizozipitia Vladimir Putin na Angela Merkel
Vladimir Putin amekuwa akiiongoza Urusi tangu 2000. Angela Merkel amekuwa akiiongoza Ujerumani tangu 2005. Uhusiano wa Rais huyo wa Urusi na Kansela wa Ujerumani umepitia misukosuko mingi. Ingawa mwanzo walianza vizuri.
Picha: picture-alliance/dpa
Viongozi wanaoinukia
Mwaka 2002, Merkel alikuwa kiongozi wa kilichokuwa wakati huo chama cha upinzani cha Christian Democratic Union (CDU). Putin alikuwa wakati huo rais mpya wa Urusi. Baada ya kukutana na Putin nchini Urusi, Merkel aliwaambia wasaidizi wake kwa utani kwamba amefaulu "mtihani wa KGB" kwani aliweza kutuliziana macho na Putin.
Picha: picture-alliance/dpa
Merkel kama Kansela mpya mtarajiwa
Putin alikuwa na urafiki na aliemtangulia Merkel, Gerhard Schröder, na viongozi hao wawili wameendeleza urafiki wao hadi hii leo. Mnamo 2005, ilikuwa wazi kwamba Merkel ndiye atakaempokonya kiti cha Ukansela Schröder wa Social Democrat. Hivyo Putin alikutana na Merkel katika ubalozi wa Urusi mjini Berlin.
Picha: imago/photothek/T. Koehxler
Mwanamke anayejua kusikiliza kwa umakini
Takriban mwaka mmoja baadaye wakati Merkel ameshakuwa Kansela, Putin alisema: "Hatujuani vizuri sana, lakini nimevutiwa na uwezo wake wa kusikiliza," alimuambia mtangazaji wa kituo cha Ujerumani cha MDR kutoka Dresden, akiongeza kuwa uwezo wa kumsikiliza mwengine kwa umakini ni kitu nadra miongoni mwa wanasiasa wanawake.
Picha: picture-alliance/dpa/M. Hiekel
Je, Putin alijaribu kumtisha Merkel kwa kutumia mbwa?
Sio siri kuwa Merkel anaogopa mbwa. Hata hivyo, Putin alimruhusu mbwa wake mweusi Konni kuranda kwenye eneo alikomkaribisha Kansela huyo mjini Sochi Januari 2007. Je, lengo lake lilikuwa ni kujaribu kumtisha? Hivyo ndivyo anavyodhani Merkel: "Naamini rais wa Urusi alikuwa anajua fika kuwa sikufurahia kuwa karibu na mbwa wake, lakini bado alimruhusu kuwa karibu nasi."
Picha: picture-alliance/dpa/S. Chirikov
Merkel amrushia Putin maneno ya kejeli
Kufikia 2012, Vladimir Putin alikuwa ameanza kuwaminya waandishi wa habari na wapinzani wa kisiasa. Alipoulizwa juu ya uhuru wa vyombo vya habari wakati alipokuwa mjini Saint Petersburg, Merkel alijibu kwa nia ya kumkejeli kiongozi mwenzake: "Ikiwa nitakasirika kila wakati ninaposoma gazeti, basi nisingeweza kuwa Kansela hata kwa siku tatu," alisema Merkel.
Picha: picture-alliance/dpa
Mazungumzo yaendelea uhusiano ukisuasua
Uhusiano kati ya Urusi na mataifa ya Ulaya ulizidi kuwa mbaya baada ya kulikamata kwa nguvu eneo la Crimea mwaka 2014. Lakini Putin aliviambia vyombo vya habari vya Ujerumani kwamba bado wanaendeleza uhusiano wao wa kikazi yeye na Kansela Merkel. "Namuamini. Ni mtu muwazi sana. Lakini kama binadamu mwengine, ana mapungufu yake," aliliambia gazeti la Bild la Ujerumani.
Picha: picture-alliance/dpa/A. Nikolskyi
Sikusudii kumtukana lakini ...
Sikusudii kumtukana mtu yoyote, lakini matamshi ya Merkel yanatokana na hasira iliyojificha kwa muda mrefu kuhusu uhuru wenye kikomo," Putin aliviambia vyombo vya habari vya St. Petersburg 2017, akizungumzia matamshi ya Merkel wakati wa hotuba ya kampeni ya uchaguzi wakati akiwahimiza viongozi wa mataifa ya Ulaya kujitegemea wenyewe wakati wa mvutano na rais wa zamani wa Marekani Donald Trump.
Picha: picture-alliance/AP Photo/D. Lovetsky
'Lazima tuwe tunazungumza'
Merkel alipowasili Sochi 2018, Putin alimkaribisha kwa kumpa shada la maua. Je, ni ishara ya kutafuta amani? Haijulikani. Lakini Merkel alisema mazungumzo kati yao lazima yaendelee. "Hata kama tunatofautiana sana katika baadhi ya maswala, lazima tuwe tunazungumza, vyenginevyo tutatumbukia kwenye ukimya wa milele."
Picha: picture-alliance/Sputnik/S. Guneev
Mkono wa 2020
Angela Merkel alikutana na Putin nchini Urusi Januari 2020. Tangu wakati huo uhusiano wao umeharibika tena kutokana na uingiliaji kati wa Urusi katika mzozo wa Ukraine, lakini pia jinsi taifa hilo linavyonyanyasa wapinzani, hasa Alexei Navalny aliyekamatwa baada ya kurudi Urusi kutoka Ujerumani alipokuwa akipatiwa matibabu.
Picha: picture-alliance/AP Images/P. Golovkin
Picha 91 | 9
Wachambuzi hata hivyo wana mashaka kama mkutano wa Merkel na Putin utaimarisha mahusiano ya Ujerumani na Urusi.
Mchambuzi wa kisiasa kutoka Baraza la Ujerumani kuhusu Mahusiano ya Kigeni Stefan Meister anasema Urusi imekuwa utawala wa kimabavu. Na kuzorota kwa mahusiano kati ya nchi hizo kunadhihirishwa katika kuharibika kwa uhusiano wa kibinafsi wa viongozi hao wa muda mrefu. "Kimsingi, mahusiano kati ya Ujerumani na Urusi yamezorota kabisa. Yanaharibika kila mwaka. Merkel hatoweza kushawishi lolote katika mazungumzo hayo. Lakini bila shaka atajadili masuala haya, Nord Stream 2, Donbas, masuala ya usalama Afghanistan. Na huo ndio utakuwa urithi wake."
Msemaji wa Merkel, Steffen Seibert aliwaambia waandishi wa habari wiki hii mjini Berlin, kuwa mazungumzo ya leo mjini Moscow yatakuzwa kuhusu maswali makubwa ya kimataifa yanayostahili majibu.
Kansela Merkel ameelekea Urusi katika mkesha wa kumbukumbu ya Navalny kuanza kuugua ghafla wakati akiwa kwenye ndege katika mkoa wa Siberia mnamo Agosti 20, 2020. Kiongozi huyo wa upinzani akahamishiwa Ujerumani kwa matibabu maalum. Madaktari waligundua aliwekewa sumu ya kuuwa mishipa ya fahamu iliyotengenezwa na Wasovieti.
Merkel mwenye umri wa miaka 67, ambaye alikulia katika upande wa Kikomunisti wa iliyokuwa Ujerumani Mashariki na kuzungumza vizuri Kirusi, kila mara anasisitiza kuwa mahusiano na Urusi yanaweza tu kuimarika kupitia mazungumzo. Ziara yake itakuwa moja ya safari za mwisho za kigeni akiwa Kansela kwa vile hatogombea uchaguzi wa Ujerumani mwezi ujao.
Putin mwenye umri wa miaka 68, ambaye amekuwa madarakani kwa zaidi ya miaka 20, ndiye kiongozi aliyehudumu kwa muda mrefu zaidi Urusi tangu dikteta wa Kisovieti Josef Stalin.
