Mwanzo wa Bongo Flava unaweza kufuatiliwa katikati ya miaka ya 1990, wakati kizazi cha wasanii kama Saleh J, Mr II (Sugu), Gangwe Mobb kilipochukua ushawishi wa Hip Hop ya Marekani na kuupa sura ya Kitanzania kwa kutumia Kiswahili na kurap wakisimulia maisha halisi ya wananchi.

Nyimbo za Bongo Flava zilianza kutawala redio, televisheni na kumbi za burudani. Ni katika kipindi hicho ndipo jina "Bongo Flava" lilianza kujengeka, likitumika kuelezea ladha ya kipekee ya muziki wa kizazi cha vijana wa Tanzania. Msanii wa muziki wa Bongo Flava Ahmad Ali akijulikana zaidi kama Madee anaeleza chimbuko la neno Bongo Flava.

"Baada ya yeye kuzicheza zile ngoma za Kiswahili, kwenye midundo hii ya Ulaya, ndio akabuni neno linaloitwa Bongo Flava lilianzia hapo 1996 kwenye kipindi cha Radio One. Mike Mhagama kwa mara ya kwanza ndio anatamka hii ni ladha ya Bongo, huu ni muziki wa Bongo Flava. Kwa hiyo 1996 ndiyo limetamkwa neno Bongo Flava", alisema Madee.

Mabadiliko zaidi ya ladha na midundo miaka ya 2000

Miaka ya 2000 ilishuhudia mapinduzi zaidi ya Bongo Flava ambapo wasanii wengi waliibuka na kutawala soko la muziki nchini Tanzania. Walichangia mageuzi makubwa kwa kuachana na kurap tu na kuanza kuimba kwa mahadhi tofauti ikiwemo rap yenyewe, R&B na Zouk.

Hapa tunazungumzia wasanii kama vile Juma Nature, Lady Jaydee, Professor Jay, TID, AY, MwanaFA, Ray C bila kusahau makundi tofauti yaliyotoa ushindani.

Wapo wanaosema Bongo Flava ya sasa imeegemea zaidi kwenye biashara kuliko ubunifu na ujumbe. Je, ni sahihi kusema kuwa soko linaamua muziki au wasanii ndio wanapaswa kuliongoza soko? Swali hilo linajibiwa na msanii wa Hip Hop kutoka Tanzania Jay Moe.

"Tulifanya muziki, pasipokuwa na FM radio, pasipokuwa na ndoto za kusema siku moja kutakuwa na radio station wimbo wangu utakuwa namna moja au namba mbili kwnye Top 10. Kwa hiyo havikutuharibu sana kiasi kwamba cha kutaka kuwa wakibiashara. Kwa sababu pia hiyo biashara yenyewe haikuwepo."

Mchango wa Teknolojia katika muziki wa Bongo Flava

Kadri teknolojia ilivyobadilika, ndivyo pia Bongo Flava ilivyobadilika. Kuibuka kwa YouTube, Instagram na majukwaa ya kusikiliza muziki mtandaoni kulifungua milango mipya kwa wasanii wa Tanzania. Mwasiti Almas anasimulia enzi walipokuwa wakifanya muziki na sasa.

"Sasa hivi kuna njia za kuonyesha kazi yako, majukwaa yako mengi, unaweza usiipige redio lakini ukaileta Instagram, ukaleta Tiktok mtu akauliza wimbo wa nani huu, akaufuatilia."

Na katika kuenzi maendeleo hayo, nchini Tanzania kunafanyika Tamasha kubwa la Miaka 30 ya Bongo flava. Tamasha hilo liliwakutanisha wasanii wakongwe na kuwakumbusha mashabiki safari ndefu ya Bongo Flava tangu ilipoanza. Madee ni mwasisi wa tamasha hilo.

"Tunasherehekea namna ambavyo wale vijana wengi wa mtaani walivyoweza kurimiza ndoto zao kupitia muziki."

Muziki wa Bongo Flava umeendelea kubadilika na kuchanganya midundo kama Amapiano na Afrobeats. Masuala kama mfumo wa hakimiliki, usimamizi, promosheni na fursa za kimataifa yote yana umuhimu.

Kutoka studio ndogo za mtaani, kwenye kaseti, CD, redio na televisheni, hadi majukwaa ya kimataifa na majukwaa ya mtandaoni, safari ya Bongo Flava imekuwa ndefu.

Leo, si tu aina ya muziki, bali ni sehemu ya utambulisho wa Tanzania na moja ya bidhaa zake kubwa za kitamaduni zinazolitambulisha taifa duniani.