Milipuko kadhaa imetikisa mji mkuu wa Ukraine, Kyiv, alfajiri ya Alhamisi baada ya tahadhari ya mashambulizi ya anga kutolewa. Waandishi wa habari wa AFP waliripoti milipuko hiyo huku maafisa wakisema Urusi ilirusha droni za mashambulizi na makombora ya balistiki kuelekea mji huo.

Mkuu wa utawala wa kijeshi wa Kyiv, Tymur Tkachenko, alisema mifumo ya ulinzi wa anga ilikuwa ikifanya kazi na kuwataka wakazi kubaki mafichoni hadi hatari itakapokwisha. Jeshi la Anga la Ukraine liliripoti shabaha za kasi zikielekea mji huo muda mfupi kabla ya mashambulizi.

Mashambulizi hayo yalijiri wakati juhudi za kidiplomasia zikiendelea mjini Geneva, ambako wawakilishi wa Ukraine wanatarajiwa kukutana na maafisa wa Marekani kujadili njia ya kumaliza vita vilivyochochewa na uvamizi mkubwa wa Urusi miaka minne iliyopita. Vita hivyo vimesababisha vifo vya mamia ya maelfu na uharibifu mkubwa hasa mashariki na kusini mwa Ukraine.

Mbali na Kyiv, milipuko pia iliripotiwa katika miji mingine. Meya wa Kharkiv, Igor Terekhov, alisema droni aina ya Shahed zililenga mji huo na kusababisha milipuko miwili. Katika mji wa Zaporizhzhia, maafisa walisema mtu mmoja alijeruhiwa baada ya mashambulizi, huku mjini Kryvyi Rig mwanaume mwenye umri wa miaka 89 akijeruhiwa na jengo la makazi kuharibiwa na moto.

Ukraine imekuwa ikikabiliwa na mashambulizi ya mara kwa mara ya usiku katika miezi ya hivi karibuni, huku Urusi ikilenga miji kwa makombora na droni, hasa wakati wa msimu mkali wa baridi.