Mukami Kimathi aliyekuwa na umri wa miaka 101 amefariki katika hospitali ya Nairobi usiku wa kuamkia Ijumaa (Mei 5).

Kulingana na binti yake, Everlyne, aliyenukuliwa na vyombo vya habari, Mama Mukami alikimbizwa hospitalini siku ya Alhamis (Mei 4) alipopatwa na matatizo ya kupumua.

Kabla ya kifo chake, mjane huyo alikuwa akiishinikiza serikali kufukua mabaki ya maiti ya marehemu mume wake kutoka jela yenye ulinzi mkali ya Kamiti ili azikwe kwake.

Kauli hizo zimepewa uhai mpya hii leo baada ya Waziri wa Biashara na Viwanda, Moses Kuria, kulitilia mkazo hilo kwenye ujumbe wake wa pole kwa familia.

Wakati huo huo, Rais William Ruto na naibu wake, Rigathi Gachagua, wametuma salamu za rambirambi kwa familia na kuahidi kumfanyia maziko ya hadhi ya juu.

Duru rasmi zinaeleza kuwa Dedan Kimathi alikamatwa na utawala wa ukoloni mwaka 1956 katika eneo la Kahigaini iliko milima ya Aberdares, na kuuawa mwaka 1957 kwenye gereza la Kamiti.