Mustakabali wa Nagorno Karabakh wajadiliwa
21 Septemba 2023![Maandamano ya Warmenia katika mji mkuu Yerevan](https://static.dw.com/image/66876944_800.webp)
Wajumbe kutoka jimbo la Nagorno-Karabakh na serikali ya Azerbaijan wanakutana kwa mazungumzo kujadili mustakabali wa jimbo hilo lililojitenga na ambalo Azerbaijan inadai inalidhibiti kikamilifu hivi sasa baada ya kuendesha operesheni kubwa ya kijeshi wiki hii kwenye eneo hilo. Jamii ya Warmenia katika jimbo hilo inalalamika kwamba wanajeshi hao wa Azerbaijan wamekiuka makubaliano ya kusitisha vita.
Mazungumzo hayo yaliitishwa baada ya wanajeshi wa Armenia katika jimbo la Nagorno Karabakh kukubali kuweka chini silaha kufuatia kuzuka upya kwa mapigano hivi karibuni katika mvutano wa miongo kadhaa wa kuwania udhibiti wa jimbo hilo.
Maafisa wa Nagorno Karabakh na shirika la habari la serikali la Azerbaijan wote wameripoti kwamba mazungumzo ya leo katika mji wa Azerbaijan wa Yevlakh, baina ya viongozi wa jimbo hilo na serikali ya mjini Baku, yatajikita katika kuangalia namna ya kulijumuisha tena jimbo hilo lililojitenga katika nchi ya Arzerbaijan.
Ingawa wakati ikielezwa mazungumzo hayo yameanza, ripoti nyingine zinasema kwamba maafisa wa Armenia wameripoti juu ya kusikika kwa milio ya risasi katikati ya mji mkuu wa jimbo hilo, Stepanakert. Vyanzo viwili vililiambia shirika la habari la Reuters asubuhi kwamba milio ya risasi imesikika.
Kadhalika jamii ya Warmenia katika jimbo hilo linalozozaniwa imesema wanajeshi wa Azerbaijan walioko katika eneo hilo wamekiuka makubaliano ya kusitisha vita ingawa wizara ya ulinzi ya nchi hiyo imekanusha madai yaliyotolewa.
Mamlaka ya jimbo hilo linalokaliwa na jamii kubwa ya Warmenia inayoendesha shughuli zake bila ya kutambuliwa kimataifa tangu vilipozuka vita mwanzoni kabisa mwa miaka ya 1990, jana Jumatano mchana ilitangaza kwamba vikosi vyake vya ulinzi vitaweka chini silaha na kuvunjwa chini ya makubaliano ya amani yaliyosimamiwa na Urusi.
Rais wa Azerbaijan Ilham Aliyev alisifu ushindi wa wanajeshi wake kupitia hotuba yake kwa taifa akisema jeshi la nchi yake limeyarejesha mamlaka ya jimbo la Nagorno Karabakh.
Baraza la usalama la Umoja wa Mataifa liliitisha mkutano wa dharura kufanyika leo alhamisi kufuatia ombi la Ufaransa, kuhusiana na operesheni hiyo ya Azerbaijan. Armenia imeuonya Umoja wa Mataifa kwamba Azerbaijan inaendesha harakati za takasatakasa ya kikabila katika jimbo hilo la Nagorno Karabakh.
Mjumbe wa haki za binaadamu katika jimbo la Nagorno Karabakh Ombudsman Geghan Stepanyan amesema kiasi watu 200 wakiwemo raia 10 waliuwawa na zaidi ya wengine 400 walijeruhiwa kwenye mapigano na watoto wametajwa kuwa miongoni mwa waliouwawa na waliojeruhiwa.Ingawa idadi hiyo haikuweza kuthibitishwa na vyombo huru.
Waziri Mkuu wa Armenia Nikol Pashinyan nae kwenye hotuba yake amesema Wanajeshi wa kulinda amani wa Urusi ndio wenye kuwajibika kikamilifu na usalama wa watu wa Nagorno Karabakh. Jana Waarmenia walimiminika kwenye mji mkuu wa nchi yao wa Yerevan kwa siku ya pili mfululilizo wakidai maamlaka ziwatetee Waarmenia wa Nagorno Karabakh.