Nahodha wa Paraguay, Gustavo Gómez, amesema timu yake inaingia katika mechi ya hatua ya 32 bora ya Kombe la Dunia dhidi ya Ujerumani ikiwa na imani kubwa ya kufanya vizuri. Mchezo huo unatarajiwa kuchezwa Jumatatu huku Paraguay ikisaka nafasi ya kufuzu robo fainali.

Kupitia ukurasa wake wa Instagram, beki huyo mwenye umri wa miaka 33 amesema Paraguay imerejea kushindana katika kiwango cha juu na kwamba wachezaji wataendelea kupambana hadi dakika ya mwisho. "Bado haijaisha," aliandika.

Paraguay imefuzu hatua ya mtoano ya Kombe la Dunia kwa mara ya kwanza tangu mwaka 2010. Timu hiyo ilijikatia tiketi kama moja ya timu nane zilizomaliza katika nafasi ya tatu zenye rekodi bora zaidi kwenye hatua ya makundi.

Hii itakuwa mara ya pili kwa Paraguay na Ujerumani kukutana kwenye Kombe la Dunia. Mara yao ya kwanza ilikuwa mwaka 2002 katika hatua ya 16 bora, ambapo Ujerumani ilishinda kwa bao 1-0 lililofungwa mwishoni mwa mchezo.

Gómez amesema safari ya kurejea kwenye mashindano hayo haikuwa rahisi, akieleza kuwa ni wachezaji pekee wanaofahamu changamoto walizopitia katika miaka ya hivi karibuni. Amesema sasa wako tayari kupigania heshima ya taifa lao mbele ya dunia.

Nahodha huyo amewataka mashabiki kuendelea kuiamini timu hiyo, akisema kwamba kwa Waparaguay wanaoamini hakuna jambo lisilowezekana. Amehitimisha ujumbe wake kwa kauli: "Pamoja tuna nguvu zaidi."