Mkuu wa wanamgambo ambaye alikuwa mwenyeji wa serikali dhaifu ya Somalia ameirudisha kwenye udhibiti wa Umoja wa Mataifa ofisi ya masuala ya msaada wa kibinaadamu ambayo aliinyakuwa siku mbili zilizopita katika mji mkuu wa kujishikiza wa Jowhar nchini Somalia.

Taarifa ya Umoja wa Mataifa imesema mbabe huyo wa vita Mohammed Omar Habeeb alizirudisha funguo za ofisi hiyo kwa Shirika la Kuwahudumia Watoto la Umoja wa Mataifa UNICEF mapema leo hii.

Habeeb ambaye anajulikana zaidi kwa jina la utani la Mohamed Dheere hakutowa maelezo yoyote ya kuinyakuwa ofisi hiyo hatua ambayo imetibuwa shuhuli za misaada ya kibinaadamu.

Mipango ya shughuli za UNICEF katika mji wa Jowhar inajumuisha maji,elimu,UKIMWI na virusi vya HIV pamoja na miradi ya vijana.