Wizara ya ulinzi ya Urusi imesema vikosi kadhaa vilivyohusika katika mazoezi ya rasi ya Bahari Nyeusi ya Crimea, ambayo Urusi iliichukua kimabavu kutoka Ukraine mwaka wa 2014, sasa vimerejea makambini.

Soma zaidi: Scholz akutana na Putin, Urusi yaondosha wanajeshi mpakani

Shirika la habari la serikali Ria Novosti lilitoa video ikionyesha msafara wa vifaru na magari mengine ya kijeshi yakisafiri gizani kwenye daraja la Crimea linalounganisha rasi hiyo na Urusi. Wizara ya ulinzi haikutoa maelezo zaidi kuhusu aina ya wanajeshi walioondolewa na idadi ya askari waliohusika.

Hatua hiyo inaleta matumaini madogo kuwa mzozo huo kwenye mpaka wa Ukraine unapungua baada ya wiki kadhaa za shughuli lukuki za kidiplomasia na vitisho kutoka kwa nchi za Magharibi vya kutangaza vikwazo vikali kama Urusi itaivamia Ukraine. Lakini mashaka kuhusu nia ya Moscow bado ni makubwa. Ukraine, Marekani, madola ya Ulaya na Jumuiya ya Kujihami ya NATO wote wamedokeza kuwa hawawezi kuiamiamini Urusi moja kwa moja kwa inachosema na kuwa wanahitaji uthibitisho huru.

Soma pia:Marekani inatarajia nini kutoka Ujerumani katika mzozo wa Ukraine?

Rais wa Halmashauri Kuu ya Ulaya Ursula von der Leyen amesema leo kuwa Urusi bado inahitaji kuthibitisha kuwa iko tayari kuutuliza mzozo.

Von der Leyen amewaambia wabunge wa Ulaya kuwa Moscow inatuma ishara zinazokinzana, akimaanisha masharti ya Bunge la Urusi ya kuyatambua majimbo ya mashariki mwa Ukraine ya Donetsk na Luhansk pamoja na kauli ya mkuu wa NATO Jens Stoltenberg iliyosema bado hawajaona ushahidi wa kupungua vikosi vya Urusi mpakani.

Mjini Brussels, mawaziri wa ulinzi wa nchi 30 wanachama wa NATO – akiwemo Waziri wa Ulinzi wa Marekani Lloyd Austin – baadaye leo watajadili mipango ya hatua Zaidi za kuizuia Urusi dhidi ya kuivamia Ukraine.

Washirika wa NATO wamekuwa wakipeleka manowari zaidi, ndege za kivita na askari mashariki mwa Ulaya na kuwaweka wanajeshi wengine katika hali ya kuwa tayari kutumwa vitani.

Soma pia: Urusi yaanza kuondoa wanajeshi wake Ukraine

Wakati huo huo, Ukraine inaadhimisha leo kile imekiita "siku ya umoja”. Rais Volodymyr Zelensky aliitangaza siku hiyo mapema wiki hii baada ya ripoti katika vyombo vya Habari vya Marekani kutaja Februari 16 kuwa siku ambayo Urusi ingefanya uvamizi.

Waukraine walipeperusha bendera za taifa na kucheza wimbo wa taifa kuonyesha umoja dhidi ya kitisho cha uvamizi wa Urusi. Rangi za taifa za njano na bluu zilishamiri kila mahali kuanzia shuleni, hospitalini hadi nje ya maduka.

dpa, reuters, ap, afp