Kupitia taarifa ya ofisi ya Netanyahu, Waziri huyo wa turathi Amihay Eliyahu kutoka chama cha siasa kali za mrengo wa kulia, katika serikali ya muungano amesimamishwa kwa muda katika mikutano ya baraza hilo.

Eliyahu alipoulizwa katika mahojiano na radio moja nchini humo kuhusu uwezekano wa kutupa bomu la nyuklia Gaza, alisema hiyo ni njia moja ya kuwaondoa kabisa watu wa Gaza aliyowaita washirika wa Hamas.

Ofisi ya Netanyahu imesema matamshi ya Waziri huyo hayana nafasi kwa hali halisi inayoendelea sasa na kwamba Israel inatekeleza mashambulizi yake kwa kuzingatia sheria ya kimataifa.

Msemaji wa kundi la Hamas amesema matamshi ya Eliyahu yanawakilisha kile alichosema ni ugaidi wa Israel unaotoa kitisho kwa kanda nzima na dunia kwa ujumla.