Wataalamu wamesema ongezeko hilo la mbu huenda likachochea kuyarudisha nyuma mafanikio ya miongo kadhaa yaliyopatikana katika mapambano dhidi ya ugonjwa huo. Asilimia 95 ya visa milioni 249 vya ugonjwa wa Malaria na vifo laki 608,000 duniani vimetajwa kutokea barani Afrika. Hata hivyo, ongezeko la aina hii mpya ya mbu sugu barani humo huenda ikachangia kuongeza idadi hiyo ya wagonjwa na vifo.Mbu aina ya Anopheles Stephensis hupatikana kwenye mataifa ya Kusini mwa Asia na Mashariki ya Kati, lakini waligunduliwa kwa mara ya kwanza kuwepo katika eneo la Pembe ya Afrika, nchini Djibouti mnamo mwaka 2012. Mkuu wa kitengo cha kupambana na Malaria katika shirika la Marekani la USAID, Meera Venkatesan amesema uvamizi na kusambaa kwa aina hiyo ya mbu unaweza kubadili kabisa hali katika bara la Afrika na kurudisha nyuma hatua zilizopigwa katika juhudi za kuikabili Malaria.