Khan kupitia ukurasa wake wa Twitter ameikaribisha hatua hiyo ya kumuweka katika kile kinachojulikana kama Orodha ya Udhibiti wa Kuondoka, ECL, akisema hana mpango wa kwenda nje ya nchi, zaidi ya kuchukua likizo za mapumziko za nchini humo.  

Khan aliyeondolewa madarakani kwa kura ya bunge ya kutokuwa na imani mwaka uliopita, anakabiliwa na kesi kadhaa za ufisadi na hatua ya kukamatwa ya Mei 9 na kufikishwa mahakamani ilichochea maandamano yaliyosababisha vifo vya watu 9 na baada ya siku tatu aliachiwa kwa dhamana na mahakama ya juu zaidi.