Kituo cha Televisheni nchini Saudi Arabia cha Al-Arabiya kimeripoti kwamba jeshi la taifa na kikosi cha wanamgambo wenye nguvu wa RSF wamekubaliana kuanza mazungumzo yasiyo ya moja kwa moja kuutafutia suluhu mzozo unaoendelea.

Hakuna maelezo ya ziada yaliyotolewa kuhusu habari hizo na pande hasimu nchini Sudan bado hazijatoa tamko lolote.

Licha ya taarifa hizo, mapigano bado yameutikisa mji mkuu wa Khartoum na viunga jirani usiku wa kumakia leo kwa mashambulizi ya anga na makabiliano ya ardhini.

Saudi Arabia na Marekani zimekuwa wapatanishi wa mzozo huo tangu ulipozuka kiasi miezi miwili iliyopita lakini bado hakuna usitishaji kamili wa mapigano ulioafikiwa.