Katika siku yake ya pili nchini Sudan Kusini, Kiongozi huyo wa kanisa katoliki amewahutubia maaskofu wa Kikatoliki, mapadre na watawa katika mji mkuu Juba wakati Askofu Mkuu wa Kanisa la Uingereza na kiongozi wa Kanisa la Scotland wakiendesha ibada katika maeneo mengine.

Papa Francis amesema kama viongozi wa kanisa, nao pia wanatakiwa kuwaombea watu, kupaza sauti zao dhidi ya dhuluma na matumizi mabaya ya madaraka ambayo yanakandamiza na kutumia vurugu ili kukidhi malengo yao. Papa Francis, Askofu Mkuu wa Canterbury Justin Welby na Mkuu wa Kanisa la Scotland Iain Greenshields watakutana na watu waliopoteza makazi kutokana na vita na kusikiliza simulizi zao baadae leo.